Сумар дня на 30. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 30. листопада/новембра 2023 р.

Неправдивы ствержыня Інституту Нацийональной Памяти

Вчера Інститут Нацийональной Памяти поінформувал, што слідство в справі рішыня о проведіню Акциі Вісла было піддане ремісиі, значыт – же прокуратор Комісиі Гоніня Злочынів проти Польскому Народови в Ряшові не виділ основ потвердити, же выселіня Лемків і Украінців было злочыном проти людства ани комуністичным злочыном. Тото неправдиве і лжыве для лемківской соспільности рішыня было опубликуване на офіцияльным сайті Інституту Нацийональной Памяти як комунікат. Слідство в справі акциі Вісла было зачате на внесок Обєднаня Украінців в Польщы і Обєднаня Лемків, а тіж єдного з Украінців, якій был выселеный в 1947 р. О веденым слідстві не были поінфомуваны інчы орґанізациі, в тым лемківскы. ІНП пише м.ін., што выгнаня мало превенцийный і охороннный вид – а не репресийный. Подля ІНП цілью акциі Вісла не было переслідуваня буд-котрой нацийональной ґрупы, ани єй знищыня. Тоты скандаличны стверджыня перечат тому, чого досвідчыла лемківска меншына, яка – як етнічна ґрупа – в наслідсті выгнаня была лишена не лем материяльной спадковины, але духового та культурового богатства. Катеґорично протестуєме проти того рода стверджыням, якы вдаряют в добре мено і цілу тяжку долю Лемків другой половины ХХ столітя.

В суботу святкуваня Дня Русинів

Припоминаме, што ближат ся центральны святкуваня нашого нацийонального свята – Дня Русинів. Каждого рока 5. грудня/децембра празднуєме наше нацийональне свято для упамятніня віче во Фльоринці в 1918 році, якє пак дало початок Рускій Народній Республиці Лемків. Того рока одзначыме тото лемківскє свято в суботу 2. грудня/децембра. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці. О 14.30 год. упамятниме 105. річницю віче во Фльоринці в долинці при грекокатолицкій церкви. Дальше, як каждого рока, споминовы подіі будут проходити в Рускій Бурсі в Ґорлицях. Од 16.00 год. буде там проходила стріча, в рамках котрой буде мож м.ін. выслухати доповід Міляна Яна Піліпа о русиньскій нацийональній символиці. Артистично подію дополнит выступ діючого при Рускій Бурсі ансамблю Терочка. Просиме до спільного святкуваня!

Публикация о нашым языку

Як інформує Center for Research and Practice in Cultural Continuity, якій діє при Варшавскым Університеті як раз тепер вказала ся лемківска версия антистиґматизацийного пакєту проєкту Language as a Cure «Меншыны і іх языкы в кризі». Публикация возникла в результаті спілпрацы дослідників з експертами з соспільности етнічной меншыны: лемківской, кашебской, шлезской і вілямівской. Публикация по лемківскы анализує влияня досвідчаной меншынами дискримінациі на іх здоровля і добростан, але тіж хосен з бесідуваня в рідным языку ци тіж наслідства пандеміі. В опрацуваню находят ся практичны рекомендациі і розвязаня, якы можут помочы поправити обставины фунґуваня меншыновых груп в Польщы. Лемківску версию публикациі зрыхтували нашы редкацийны камараткы: Анна Масляна і Моніка Тылявска.

Свято копальників в любіньскым округу

В звязку з ближучым ся Святом Копальників, в Копальничым Закладі Рудна одбыла ся шторічна академія, де нагороджено копальників, інформує о тым ґміна Польковиці. В академіі брали участ м.ін. представникы воєвідскых і самоурядовых власти з реґіону. В майнах близко Польковиц, Рудной, Любіна ци Ґлоґова робит наштоден вельо Лемків. При нагоді припоминаме, што 4. грудня/децембра в православній церкви в Любіні о 08.30 год. одбуде ся богослужыня, якє очелит владыка Юрий, архієпископ вроцлавско-щеціньскій, де будут возношены молитвы за копальничый стан.