Сумар дня на 30. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 29. квітня/апріля 2020 р.

Смутна річниця в істориі грекокатоликів на Словациі

Грекокатолицка Церков на Словациі 28. квітня/апріля припоминала собі смутну річницю тзв. Пряшівского Собору. Тота подія офіцияльно і публично завершыла ліквідацию Грекокатолицкой Церкви в бывшій Чехословациі. Як інформувал пресовый секретар Пряшівской Грекокатолицкой Архієпархіі Михал Павлишынович, споминовы подіі, котры мали припомнути тоту смутну річницю в істориі грекокатоликів на Словациі, з причыны пандеміі пересунены были на пізнійшый термін, котрый не єст іщы знаный. На тзв. Пряшівскым Соборі был принятый маніфест з постановом, подля котрой грекокатолицкы вірны вертают ся до Православной Церкви. Єдночасно маніфест зліквідувал діяльніст Грекокатолицкой Церкви в Чехословациі. В тым часі коли проходил собор, чехословацка безпека арештувала єпископа Павла Петра Ґойдича, днес блаженного Католицкой Церкви. Собор был лем початком насиленых переслідувань священників і вірных Грекокатолицкой Церкви. Як підчеркнул секретар єпархіі, 70. річницю рыхтували зорґанізувати м.ін. в Лепольдові, де мала быти одкрыта пропамятна таблиця. Містила ся гын вязниця, де был мученый і вмер блаженный владыка Ґойдич. В плянах єст і одкрыти таблицю на будові ПКО – Чорный орел в Пряшові, де перед роками проходил тзв. собор.

Бієнале одкликане

В звязку з пандемійом коронавіруса вшыткы культурны подіі на обшыри Польщы мусят быти одкликаны. На май заплянуване было ХІ Бієнале Лемківской/Русиньской Культуры в Креници. Як інформувал нашу редакцию ведучый Стоваришыня Лемків, Андрий Копча, подія в маю напевно ся не одбуде. Подля його слів, кєд буде на тото згода власти і ситуация даяк ся поправит, быти може тогорічне Бієнале буде пересунене на осін, правдоподібно на місяц вересен/септембер. Хоц і тото не єст певне, беручы до увагы голосы, же в Польщы такій стан може потырвати на вельо долше. Бієнале то єдна з культурных подій рыхтуваных, як сама назва вказує, што два рокы через Стоваришыня Лемків, при спілпрацы зо Світовом Радом Русинів і містом Крениця. Все одбывают ся концерты запрошеных ґруп, котры презентуют фольклор Русинів з ріжных реґіонів. Окрем того засіданя має Світова Рада Русинів. В рамках Бієнале проходят выставы, поетичны вечеры і бесіды. Кєд буде подана нова дата торогічного Бієнале, будеме інформувати. При нагоді ведучый СЛ заявил, же покля што дата михалівской Ватры єст актуальна.

Свидник выходит наперед туристичным потребам

Mісто Свидник рыхтує нову туристичну атракцию. Має ньом быти выдокова вежа. Власти хочут єй поставити над містом, коло лыжной стациі. Кошт інвестициі то понад 60 тис. евро. Як подає пріматорка міста Марцела Іванчова, будова вежы є тепер добром думком, понеже пришол час, коли люде не будут подорожувати, зато треба забезпечыти атракциі на місци. Проєкт є рыхтуваный приблизно через пілтора рока. Власти Свидника старают ся о дотацию в Уряді Підпредседы влады Словацкой Республикы. Свидник внескувал о 50 тис. евро, решту грошы выдал бы зо своіх фінансів. Вежа буде побудувана в такій части міста, котра на тепер не є до кінця одвиджана туристами. Зато місто хоче выкорыстати тоту обшыр, на якій ся находит нефункцийонуючый обєкт. Подля слів пріматоркы таку вежу даст ся поставити за два-три місяці.

Од 4. мая другій епат полюзуваня

Припоминаме, што польскій уряд влады плянує постепенно одкрывати ріжны сферы жытя, котры з причыны пандеміі сут уж близко од місяця заказаны. То єдна з части проєкту «Нова нормальніст». Од 4. мая будут одкрыты наново декотры спортовы обєкты. То тзв. ІІ етап вертаня до нормальности. Футбольова екстракляса зачне грати од 29. мая, а спідвей зас верне 12. червця/юнія. Заєдно дальше будут обовязувати даякы ограничыня. На стадіонах, шкільных боісках (в тым Орликах) буде могло перебывати максимально до 6 осіб. По 2 особы будут мочы хоснувати предметы зовнішньой інфраструктуры, як каякы ци човна. На тенісовых кортах буде могло грати до 4 осіб на єден корт. Дальше треба буде тримати ся на дистанс і закрывати уста і ніс. В того рода обєктах не буде мож корыстати з шатні. Буде тіж обовязкова дезинфекция рук для осіб, котры входят або выходят з обєкту. В ІІІ етапі мают быти одкрыты спортовы змаганя в шкільных салях і галях. В ІV етапі одкрыют наново такы обєкты як клюбы фітнес ци скейтпаркы.