Сумар дня на 30. червця/юнія 2023 р.

Приносиме вам сумар медияльной ґрупы ЛЕМ.фм+ на ден 30. червця/юнія 2023 р.

Выізд для діти з Руской Бурсы

Стоваришыня Руска Бурса в Ґорлицях орґанізує для охочых діти выізд з нагоды кінця шкільного рока і початку вакаций. Запрашаме на дармову прогульку до Етноґрафічного Парку Музею Народной Культуры в Кольбушовій. В проґрамі выізду буде обзераня скансесну, варштаты, печыня кобаскы і спільне музикуваня. Прогулька одбуде ся в найблизшу середу 5. липця/юлия, выізд о год. 7.30 спід будинку Бурсы. Родиче прошены сут зголосити охочы діти до участи в прогульці до понеділька до 20.00 год., пишучы на майльовый адрес sekretariat@ruskabursa.org, мож тіж дзвонити під номер: 606108701. Просиме діти в каждым віку.

Консультациі в Рускій Бурсі уж заран

Припоминаме, што заран, в суботу 1. липця/юлия в Рускій Бурсі в Ґорлицях пройде консультацийна стріча в справі вписаня на Державный Спис Нематерияльной Культурной Спадковины лемківского языка і лемківской культуры. Подія зачне ся о 15.00 год. і прошены сут на ню вшыткы Лемкы, котры ідентифікуют ся з лемківскым языком і лемківском культуром. Консультациі орґанізуваны сут Стоваришыньом «Руска Бурса» в Ґорлицях і Стоваришыньом Лемків.

Спільна молитва за основателя лемківского радия

В тот сам ден, в суботу 1. липця/юлия, перед тым як стрітиме ся на консультациях в Рускій Бусі, просиме до спільной молитвы спомнути памят нашого приятеля, а основателя радия ЛЕМ.фм – Богдана Ґамбаля. Служба правлена буде о 11.00 год. в каплици на Св. Горі Явір. То уж три рокы одколи неє медже нами чловека, без котрого не было бы штоденного нашого жывого слова і нашой музикы. Богдан Ґамбаль был вельолітнім діячом, активістом, політиком, ведучым Стоваришыня «Руска Бурса» в Ґорлицях – реактиватором орґанізациі та спілосновательом Стоваришыня Лемків.

Православне поломництво на Св. Гору Явір

О нецілы два тыжні православны Лемкы будут на Святій Горі Явір празднувати ден Святых Петра і Павла. Традицийно, Братство Православной Молодежы Перемышльско-Ґорлицкой Єпархіі просит до участи в ХХХІІІ Пішым Поломництві Православной Молодежы на Святу Гору Явір. З благословліня архієпископа Паісия одбуде ся оно в днях 10.-12. липця/юлия. Поломництво зачне ся Літургійом в церкви св. Димитрия в Бодаках, пак поломникы перейдут до Ґладышова. Наступный ден зачне ся Літургійом в церкви Рождества св. Йоана Хрестителя, дальше поломникы підут до Ганчовы, де в храмі Покровы Пресвятой Богородиці буде правлена святочна всеночна. 12. липця/юлия, в свято Первоверховных Апостолів Петра і Павла, в ганчівскій церкви рано одсуженый буде молебен, по якым поломникы перейдут до Высовы. Там в церкви св. Архістратига Михала будут привитаны прибывшы єрархы, по чым вірны выйдут на верх св. Горы Явір. О 10.00 год. зачне ся там архієрейска Літургія. Записы на православне поломництво сут одкрыты до середы 5. липця/юлия.

Грекокатолицкє поломництво на Св. Гору Явір

Поломництво на Святу Гору Явір одбудут і грекокатолицкы вірны. Зачне ся оно Службом Божом в давній марийній санктуариі, грекокатолцкій церкви Покровы Богородиці в Гыровій в неділю 9. липця/юлия о 12.00 год. Дальше, першый і другый ден поломництва будут проходити стацийонарно в Крампній. Третього дня поломникы выйдут в сторону Грабу, а наступны дни перейдут до Ждыні і Высовы. В пятницю 14. липця/юлия перейдут на Святу Гору Явір, де будут правлены молебен до Пресвятой Богородиці і Понтифікальна Літургія з процесийом вколо каплици. Записы на грекокатолицкє поломництво сут одкрыты до днес, 30. червця/юнія.