Сумар дня на 30. червця/юнія 2021 р.

Приносиме вам сумар медияльной ґрупы ЛЕМ.фм+ на ден 30. червця/юнія 2021 р.

Што з лісами? Зміны в Кодексі адміністрацийного поступуваня

24. червця/юнія тр. Сойм Польской Республикы схвалил зміны в Кодексі адміністрацийного поступуваня, котры впроваджают границю часу, по котрій не буде мож старати ся о зрушыня старых адміністрацийных рішынь, якы были выдаваны з грубым порушыньом права. Пропонуваны зміны вдаряют в ріжны ґрупы заінтересуваных, в тым лемківску меншыну. Приняты пропозициі змін дотыкают предовшыткым тых, якы на основі законів выдаваных польскыма комуністичныма властями были позбавлены своіх маєтків, ци односно котрых были выдаваны незаконны декреты. В тій ґрупі осіб очывидно сут Лемкы, якы доднес лем в невеликій мірі выступили хоц бы з внесками о анулюваня декретів о зрабуваня комуністичныма властями лемківскых лісів. Актуально справа можливости одзыскуваня лемківскых лісів є веце зложена. Но, на приняты зміны польского Сойму остро зареаґували уж власти Ізраіля, якого громадяне надале старают ся одзысати довоєнны жыдівскы маєткы.

Зышли ся своі і сусіды

В остатню суботу, 26. червця/юнія, одбылo ся привитаня «Лемківского Літа» в Чмели. То каждорічна подія орґанізувана православном парохійом св. Тройці в Любіні, де настоятельом єст о. Богдан Репела. Літо по лемківскы витали не лем самы Лемкы, але і польскы сусіды, якы дружньо брали участ в зрыхтуваным проґрамі – од спільной молитвы на початок суботнього пополудня по концерты і забавы для діти. На подію, яка проходила під патронатом Маршалка Нижньошлезского Воєвідства, пришли чысленны локальны самоурядовы власти. Окрем інчых, на запрошыня орґанізаторів брал в ній участ бургомайстер Хоцянова, Томаш Кульчыньскій. В теплых словах повіл він, же «Лемківскє Літо» єст том імпрезом, яка орґанізувана єст на обшыри його ґміны, і то як раз єй собі найвеце цінит і є му найблизша.

В Любіні выстава. Серед експонатів тіж тоты даруваны Лемками

В Осередку Культуры Ґміны Любін презентувана є нова выстава пн. «Ґміна Любін – вчера і днес». Ґмінный мінімузей переносит обзераючых до часів, коли ґмінну соспільніст зачынали творити новы жытелі-переселенці – Сибіракы, Кресовякы, жытелі центральной і східньой Польщы та выселены Лемкы. Думкодавцьом експозициі єст війт ґміны Любін Тадеуш Кєлян, якій гоббистичні занимат ся колекцийонерством. Част експонатів выставы походит з його приватной збіркы, а част то офіруваны выміненыма ґрупами річы. Сут експонаты звязаны з кухньом, єст ґаздівскє ґратя, домашнє нарядя, але сут і такы, котры хоснуваны были при реляксуваню ся і рекреациі. Выставу мож видіти особисто або в формі віртуальной прогулькы через сайт www.okgl.pl.

Камінярскы варштаты

Oд 13. до 18. липця/юлия в Етноцентрі Коросняньской Землі проходити будут камінярскы варштаты ведены Шымоном Моджеєвскым і Ґжеґожом Томковичом. То двох специялистів, котры сут авторитетами в обшыри того фаху – фаху, якым ся занимали в Низкым Бескіді. Перед роками Бортне было єдным з важнійшых центрів каміняркы в Польщы, а вельо выробленых гын артефактів, такых як кресты, мацевы ци жорна, фурт мож найти по цілій Лемковині. На варштатах представлена буде істория ремесла та знаня про обробку каменя. Участникы зроблят невеликы камінны декорацийны елементы. Варштаты сут дармовы. Веце дрібниц найдете на сайті коросняньского Етноцентра.

Фот. Ярослав Мазур