Сумар дня на 3. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 3. жолтня/октобра 2023 р.

Новый пункт Тереновой Ратунковой Стациі Креницкого одділіня GOPR в Фолюшы

В суботу 30. вересня/септембра в Фолюшы одкрыли новый пункт Тереновой Ратунковой Стациі Креницкого одділіня GOPR. Завдякы порозумліню з яселскым старостом, цілорічна стация має своє місце в будинку Социяльной Помочы в Фолюшы. Як передал начальник креницкых ґопровців Михал Слабонь, новый пункт буде добром базом для ведіня ратівничых діянь, особливо зо взгляду на можливіст скоро діяти, што єст найважнійше при інтервенцях. Збільшаюча ся популярніст Низкого Бескіду переложыла ся на більше чысло туристів, а што з тым звязане на штораз то більше чысло выпадків ци примірів страчыня ся на шляках. Місце нового пункту не єст припадкове, бо – як зазначыл Слабонь – то з Фолюша стартує коло 80% туристів, котры ідут в сторону Маґурского Парку на Корнуты, до Святковой ци Вапенного. На початку пункт буде діял в вікенды, а дижур буде полнил єден ратівник. Завдякы спілпрацы з директором Парку креницкій GOPR має сезонову базу тіж і в самым парку, а тепер при новій цілорічній пляцівці цілый Парк буде одповідньо забезпеченый.

3000-літня прикраса на шыю з Низкого Бескіду

В Низкым Бескіді археолоґы нашли прикрасу на шыю з бронзу, котра рахує около 3000 років. Од яри того рока в обшыри горы Цергова, коросняньскій повіт, Інститут Археолоґіі Ряшівского Університету під кєрівництвом Войцєха Пастеркєвича веде археолоґічны досліджыня. Цілю проєкту єст одкрыти, удокументувати та забезпечыти забыткы і археолоґічны становиска. Початком вересня/септембра в часі прац веденых при єдным з потоків дослідникы нашли округлу прикрасу на шыю зроблену з бронзу. Заховала ся она в вынятково добрым стані, беручы до увагы што долшый час находила ся в воді. Подля науковців прикраса зрыхтувана была в на початку желізной епохы, в приближыню в часовых рамах од VIII до IV в. п.н.е. Єст то першый того топу предмет найденый в Низкым Бескіді.

Потяг Hubala уж жде на пасажерів

Соспільна ініциятива «Kolej na Jasło» подала, што од першого дня жолтня/октобра на торы вернул потяг Hubala реляциі Краків-Ясло. Як і в попередніх роках, Hubal іздит головно для студентів, котры зачали академіцкій рік – курсує в кажду неділю і пятницю. В пятниці потяг буде выізджал з Кракова о год. 17.54, а в неділі одізд зо стациі Ґорлиці-Загіряны єст заплянуваный на год. 19.14. Подорож тырват 2,5 годины і реализувана єст модерным потягом Impuls, выпосаженым в інтернет ци климатизацию. Што більше, білеты на тото получыня будут нелімітуваны, што значучо полегшыт студентам вікендовы повороты в родинны стороны.

Про Ремесло в Бєщадах і Низкым Бескіді на карпатскым слуховиску

В четвер, 5. жолтня/октобра, о 18.00 год. пройде чергове карпатскє слуховиско, орґанізуване Карпатскым Народным Університетом. Тема стрічы то «Ремесло соспільности мешкаючой в Бєщадах і Низкым Бескіді». Прелекцию вюл буде Марцін Кровяк, історик, а од того рока директор Музею Народного Будівництва в Саноку. Прелекция буде проходила в формі інтернетовой стрічы, мотузок находит ся на фейсбуковым сайті Карпатского Народного Університету. Подія реализувана єст в рамках задачы «Фредро в Бєщадах і Низкым Бескіді» дофінансуваной з буджету Підкарпатского Воєвідства.

Курс польского языка для біженців і іміґантів з Украіны

Православна парохія Св. Тройці в Ґорлицях просит біженців і іміґантів з Украіны на курс польского языка. Складат ся він з 75 лекцийных годин веденых двараз в тыжни по дві годины. На закінчыня наукы буде можливіст підыйти до державного еґзаміну на цертифікат Б2. Вымогом для одкрытя курсу єст зобраня 15-особовой ґрупы. Зголошувати ся мож до 10. жолтня/октобра телефонічні або майльово. Контактовы даны находт ся на сайті Ґорлицкой Парохіі.

Fot. Grupa Krynicka GOPR