Сумар дня на 3. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 3. жолтня/октобра 2022 р.

Нова «Бесіда»

Вышло нове чысло часопису Стоваришыня Лемків «Бесіда» за місяці вересен/жолтен. В тым выданю мож чытати м.ін. реляцию з 42. Ватры на Чужыні в Михалові, рецензию словника Петра Пыртея ци інтервю з др. Євгеном Місіло. Єден з дописів прочытате і на нашым портали – то коментар Петра Трохановского пн. «Примір перфідной маніпуляциі», є о маніпуляциі Обєднаня Лемків што до першого незалежного часопису по 1989 р., якым як раз єст «Бесіда». В новым выданю нашол ся так само публикуваный на сайті нашого радия «Протест лемківской соспільности», проти дальшому фальшуваню і маніпулюваню історийом через орґанізацийю Обєднаня Лемків. Протест был підпореный вельома выдатныма науковцями – специялистами зо світа в обшыри знаня о Лемках, та ґрупом представників державных урядів з ріжных держав Европы. В части «Одышли од нас/Попращали мы» редакция встигла замістити пращальный допис о недавно помершым бл. п. Гавриілі Бескіді. Нову «Бесіду» можете чытати в бібліотеці Руской Бурсы в Ґорлицях або придбати в локальных кружках Стоваришыня Лемків. Новы і архівальны чысла годны сте придбати і в електронічній версиі на сайті Стоваришыня Лемків.

Іщы в тым році в Мощеници зачне ся будова видоковой вежы

Ґміна Мощениця підписала догваріня на будову видоковой вежы. Выконавцю повело ся найти аж в пятым конкурсі оферт. Початково ґміна на будову новой атракциі отримала понад піл мілийона злотых з Урядового Фонду Польскій Лад. Єднак пропозициі зложены фірмами в конкурсах оферт міцно перевысшыли зарезервуваны на тоту ціль середкы. Фінально інвестицию зреализує Будівляне Підприємство Новатор. Працы мают ся зачати іщы в тым році. Кошт реализациі задачы то понад 1,6 млн злотых. Подля проєкту вежа буде мала 27 м высокости. Перша видокова плятформа буде ся находила на высокости 3,5 м, а друга близко 18 м. Подля догваріня видокова вежа має быти побудувана в 13 місяців.

Неодолга креницка бібліотека буде збудена під будову амфітеатру

Од днес до одкликаня закрыта буде Публична Бібліотека в Креници. Книгы будут перенесены до будинку бывшой ґімназиі при ул. Школьній. Дотеперішній будинок Бібліотекы буде збуреный під будову амфітеатру. Амфітеатр має быти постійным місцьом, де будут орґанізувати вшыткы культурны подіі в терміні од мая до жолтня/октобра, без конечности возношыня розбераной сцены на головным тротуарі при пияльни. Має мати задашену сцену з простором 100 квадратных метрів і тисяч місц до сіджыня для публикы. Згідні з гармоноґрамом будовляны роботы зачнут ся іщы того рока, а закінчат в маю 2024 р.

Варштаты писаня ікон в Любіні

Православна парохія Святой Тройці в Любіні просит на варштаты писаня ікон. Занятя будут проходити в парохіяльній катехетичній сали в терміні од 14. до 19. листопада/новембра, в годинах од 16.00 до 20.00. Варштаты буде вюл о. Павел Заброцкій, віцедиректор Поліцейного Іконоґрафічного Студию, єдиной того рода школы в Польщы, яка вчыт в професиі техніка іконоплястика іконоґрафа. Варштаты сут платны. Мож ся на них записувати до кінця жолтня/октобра. Чысло місц ограничене.