Сумар дня на 3. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 3. вересня/септембра 2024 р.

Проф. Проф. Олена Дуць-Файфер в Проґрамовій Раді Інституту Языковой Ріжнорідности Польщы

Проф. Олена Дуць-Файфер з Ягайлоньского Університету была покликана Міністром Культуры і Нацийональной Спадковины Ганном Врублевском в склад Проґрамовой Рады Інституту Языковой Ріжнорідности Польщы. В лютым/фебруарі того рока інформували сме, што плянуване є покликаня такой інституциі і тото як раз ся довершыло. Задачом той новой інституциі культуры є охорона ріжнорідности языковой спадковины Польщы, має підперати вшыткы языкы – незалежно од іх правного статусу (напр. вілямівскій ци шлезскій языкы фурт не дождали ся отриманя статусу реґіонального языка, а тото ґарантувало бы ім системову поміч). Нова інституция має давати мериторичне, фінансове і орґанізацийне підпертя для вшыткых языковых одмін. Проф. Олена Дуць-Файфер была покликана в склад Рады на штырі рокы – од 2. вересня/септембра тр. до 1. вересня/септембра 2028 рока.

Юнесковы храми до обзераня і осіню

Вєдно з кінцьом вакаций закінчыл ся черговый сезон Одкрытого Шляку Деревяной Архітектуры. Не означат то єднак, што вшыткы обєкты сут уж заперты. До кінця рока мож обзерати в середині церкви і костелы вписаны на Листу Світовой Спадковины UNESCO на обшыри Малопольщы, значыт храмы в Бінаровій, Брунарах, Дубні, Квятони, Липници, Рыхвалді, Поворознику і Санковій. Обєкты одкрыты сут од середу до суботы од 9.00 до 18.00 год., та в неділі од полудня до 17.00 год.

Незнайова. Выстава знимок

В надходячу пятницю в Саноку одбуде ся вернісаж фотоґрафічной выставы пн. «Материя памяти». Є то ефект проєкту під тым самым наголовком, в котрым участ взял артистичный дует – Ядвіґа Яновска і Хрістофер Мысько. Роборты над цикльом знимок в Незнайовій проходят уж од двох років. Артисты-фотоґрафікы бадают достоменніст, памят і історию місця, глядают контекстів, зглубляют історию. За ціль взяли Незнайову як село, котре было жыве перед выселінями, а тепер то порожня долина. Глядают слідів по людях і прібуют знимками одповісти на звіданя: ци даст ся затримати на фотоґрафіях тото, што минуло, як вказати тото, што невидиме, і як оповісти о тых, котрых неє, і вказати духа місця, што зникнуло з материяльной стрефы. Вернісаж одбуде ся 6. вересня/септембра о 18.00 год. в Саноцкій Ґалериі BWA. Выстава буде гын вказувана до 4. жолтня/октобра тр.

Плястичный конкурс для діти ґміны Польковиці

«Сохранити історию – артистична подорож в часі», такій є наголовок плястичного конкурсу для діти основных шкіл зо вшыткых сел ґміны Польковиці, а то м.ін. зо села Собин, Суха Ґурна ци Желізный Міст. В рамках конкурсу треба зробити плястичну працу, котра буде інспірувана старыма знимками, што вказуют село, та істориями мешканців сел на тему жытя на селі. Можут то быти рисункы вказуючы сценкы штоденного жытя селян, іх роботу, звыкы ци ілюстрациі давных будинків або краєведів. Техніка выконаня робіт є свобідна. Роботы (максимальні дві од єдного автора) будут оцінюваны в окремых віковых катеґориях. Працы треба достарчыти до 15. жолтня/октобра до світлиці в Новій Веси Любіньскій. Орґанізатором конкурсу є Ґрупа Кресовых Архівістів.