Сумар дня на 3. січня/януара 2025 р.

Приносиме вам сумар медияльной ґрупы ЛЕМ.фм+ на ден 3. січня/януара 2025 р.

Одышол до вічности Тадеуш Кєлбасіньскій

Як інформувало Карпатскє Товариство, вчера, 2. січня/януара, на 94. році жытя вмер Тадеуш Кєлбасіньскій, член-основатель Карпатского Товариства, член Польского Туристично-Краєзнавчого Товариства і Польского Татряньского Товариства. Родженый в 1930 р. од початку пятдесятых років вандрувал по Карпатах і анґажувал ся в охорону іх народной культуры, особливо Лемковины. На початку 80. років купил і вратувал стару лемківску хыжу в Вільхівци і одкрыл в ній екомузей «Памяткова Хыжа». Згромадил там унікатну колекцию народных кроів з обшыри цілой Лемковины, штоденного ґратя і ручных выробів, як і обшырну тематичну бібліоотеку навязуючу до народной культуры Карпат. Орґанізувал выставы, был єдным з ініцияторів приверніня лемківкцого кєрмешу в Вільхівци. Окрем інчого был автором (під псевдонимом Тадеуш Заґужаньскій) печатаной в 1984 р. першой бібліоґрафіі Лемковины, пн. «Лемкы і Лемковина», як і публикациі «Никыфор. Бібліоґрафія», выданой з нагоды 100-літя народин Епіфана Дровняка. За свою діяльніст был вельократно нагороджуваный.

Покликана нова Полномічна Нижньошлезской Воєводы дс. Нацийональных і Етнічных Меншын

З дньом 3. січня/януара 2025 р. Марийоля Абкович была покликана Нижньошлезском Воєводом Анном Жабском на нову Полномічну Нижньошлезской Воєводы до справ Нацийональных і Етнічных Меншын. Марийоля Абкович то караімознавчыня і соспільна діячка караімского походжыня, авторка науковых і популярнонауковых публикаций караімской темы, выкладат в Інституті Орєнталистикы Выділу Неофілолоґіі Універистету ім. Адама Міцкєвича в Познані. Єст ведучом Звязку Польскых Караімів, од двадцетьох років єст членкыньом Спільной Комісиі Уряду та Нацийональных і Етнічных Меншын. До зачад полномічной належыт м.ін. координуваня на обшыри воєвідства діянь орґанів урядовой адміністрациі реализуючых задачы для нацийональных і етнічных меншын ци підниманя діянь для респектуваня меншыновых прав і протидіяня дискримінациі меншын. Полномічна спілдіє в тій ціли з орґанами територияльного самоуряду і соспільныма орґанізациями, особливо з орґанізациями нацийональных і етнічных меншын та опініює проґрамы для тых меншын, як і для захованя і розвитку реґіонального языка на обшыри нижньошлезского воєвідства.

Новы дороговы інвестициі в Вафці

Центр Вафкы має быти безпечнійшый. Ґміна Ґрибів зложыла внесок до новосандецкого староства о створіня на повітовій дорозі переходів для пішых. Жытелі хотят тіж, жебы на дорозі станули електонны таблиці вказуючы шоферам скоріст. Актуально в Вафці тырвают працы при будові ходника. Мал бы він быти завершеный в будучым році. Кєд іде о переходы для пішых – треба іщы ждати на одповідні рішыня.

Онляйновы консультациі проєкту «На шляку волошской культуры»

Днес, 3. січня/януара, одбуде ся онляйнова стріча – консультяциі проєкту «На шляку волошской культуры». Проєкт має на ціли розвиток зінтеґруваного туристичного продукту, опертого на волошскій культурі в польско-словацкых Карпатах. Ініциятива має лучыти пастырску дідовизну з розвитком туристикы і культуры Карпат. Консультациі будут проходити днес на плятформі ZOOM од 17.00 год. Мают они помочы ліпше одповісти на потребы жытелів і туристів одвиджаючых реґіон. Мотузок до стрічы найдете на фейсбуковым сайті Szlak Kultury Wołoskiej.

Христос ся Раждає!

А на конец днешніх новин хочеме передати святочны желаня вшыткым тепер празднуючым Рождество Христове, котре припадат за юлияньскым каленарьом в найблизшый віторок 7. січня/януара. Слухачам, любителям радия, з нагоды Різдва желаме вельо радости, спокою, пошаны, зрозумліня і смачной велиі при родинным столі. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях. Христос ся Раждає!