Сумар дня на 3. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 3. серпня/авґуста 2022 р.

Познай своіх ґенетичных предків. Збадай своє DNA

Уж в найблизшу суботу, 6. серпня/авґуста, в Михалові, вчас Лемківской Ватры на Чужыні буде мож взяти участ в проєкті творіня Ґеномічной Мапы Польщы. Проєкт реализує Інститут Біоорґанічной Хіміі Польской Академіі Наук (PAN) та Познаньска Політехніка. Закладат він зосеквенцийонуваня ґеномів 5000 жытелів Польщы, в тым 1000 ґеномів представників выбраных реґіональных, етнічных і нацийональных меншын. Дослідникы побрали уж пробкы од Кашебів і Шлезаків. В суботу поберати будут материял од Лемків. Пробкы DNA, взяты зо слины, побераны будут дармо, а кажда особа отримат дрібницьовый рапорт з інформациями, одкале походили єй ґенетичны предкы, напр. з якой части Европы. Подібны баданя мож зробити в приватных осередках, але іх кошт то пару, а аж і парунадцет тисячы злотых. Становиско дослідників буде ся находилo обік радийового шатра ЛЕМ.фм.

На многы і благы літа!

В неділю, 24. липця/юлия, в церкви свв. Космы і Даміяна в Студзьонках на Нижнім Шлеску празднували ювілей сотной річниці народин Владиміра Олеснєвича, якій народил ся 22. липця/юлия 1922 рока в Перунці на західній Лемковині. Олеснєвич был вельолітнім дириґентом церковного хору. Місцевый парох, о. Славомир Сороканич, передал на рукы ювілята ікону і квітя, желаючы од імене вшыткых парохіян здоровля і вельох років жытя. На ювілею пристуна была сестра Владиміра Олеснєвича, Штефанія Гайтко, троє діти, внукы, правнукы, аж і єден праправнук. Даякій час тому Владимір Олеснєвич і його сестра дали обшырны інтервю для нашого радия, в котрых оповідали про штоденніст на Лемковині перед 1947 роком, хоснуючы при тым богате словництво, котре часто призабывают молодшы ґенерациі. Оповідали так само про історию Лемків.

Серенча на Святі Мазяарів в Лоси

Найблизшый вікенд богатый буде в подіі. Як знаме, уж в пятницю зачне ся 42. Лемкіска Ватра на Чужыні в Михалові. Натоміст в горах пройде чергова едиция Свята Лосяньскых Мазярів. Не бракне дорічного конкурсу на точыня мазярской бочкы, будут варштаты про косметикы чорны як ропа, плетіня вінків знад Ропы, будут і презентациі – о коронках пані Лукасєвичовой, показ выпаляня дегтю та інчы. В проґрамі заплянували і театр тіни для діти, леґенды о ропі ци експерименты і забавы з мазярского села. Вчас подіі презентувана буде і выстава пн. «Початкы нафтового промыслу на польскых землях». Не бракне так само стоіск з реґіональныма стравами і книжками до придбаня. На пополудне заплянували коцерт ансамблю Серенча. Подія пройде в неділю, 7. серпня/авґуста, орґанізаторы просят приходити од 13.00 годины.

Ярмак ікон в Саноку

6. і 7. серпня/авґуста на саноцкым рынку пройде натоміст дорічный Ярмак Ікон. Подібні як в попередніх роках, рынок заполнит ся стоісками з ручныма выробами, образами, іконами, різбами і реґіональныма стравами. Торогічну едицию подіі прикрасит выступ ансамблю Відимо в православній цервки св. Тройці о 18.00 год. Зас на рынку своі музичны таланты запрезентуют ученикы місцевой музичной школы. Для діти заплянувли артистичны варштаты.