Сумар дня на 3. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 3. грудня/децембра 2021 р.

Польскій уряд рішучо осуджат проявы нацийональной, реліґійной або етнічной ненависти

Три тыжні тому, 11. листопада/новембра, в Калішы одбыл ся марш, участникы котрого возносили антисемітскы госла, а на Головным Рынку спалили текст Калішского Статуту – толеранцийной привілегіі для Жыдів, выданой калішскым князьом Болеславом Побожным в 1264 р. Трьом орґанізаторам маршу горозит до 5 років вязниці, за публичне кликаня до ненависти і зневагы ґрупы люди з причыны іх нацийональной приналежности і віроісповіданя, та публичного підбуряня до злочыну проти такым особам. В минулый віторок, 30. листопада/новембра, антисемітскій марш в Калішы был предметом засідяня соймовой Комісиі Нацийональных і Етнічных Меншын. Як повіл на засіданю підсекретар стану в Міністерстві Внутрішніх Справ і Адміністрациі Блажей Побожый, польскій уряд рішучо осуджат вшелеякы антисемітскы захованя і вшелеякы проявы нацийональной, реліґійной або етнічной ненависти. Як повіл: «не може быти згоды на ганебны захованя».

Владыка Юрий стрітил ся з копальниками

Каждого рока 4. грудня/децембра, на праздник св. Варвары, покровителькы копальничого стану, копальникы з Нижнього Шлеска стрічают ся на спільній молитві в храмі св. Тройці в Любіні. В звязку з ближучым ся праздником з делеґацийом копальників стрітил ся архієпископ Юрий, владыка вроцлавско-щеціньской єпархіі Польской Автокефальной Православной Церкви. Стріча одбыла ся в минулу неділю, 28. листопада/новембра, в єпископскій резиденциі во Вроцлаві. Копальничый стан репрезентувало трьох копальників – Лемків. Были то Мариян Шкурат, Іриней Шпытко і Андрий Прибыло. Вчас стрічы, окрем переданя благословліня і поздраву копальникам, архієпископ Юрий покликал православного Капеляна Копальництва вроцлавско-щеціньской єпархіі. Остал ним о. прот. Богдан Репела, парох церкви св. Тройці в Любіні, до якой приналежыт великє чысло копальників Лемків.

Нова інформацийна таблиця в Бєщадскым Нацийональным Парку

В Бєщадскым Нацийональным Парку при вході на природничу стежку Устрикы Выжні – Волосате явила ся нова інформацийна таблиця. Стежка складат ся з 19 пристанків, а єдным з них єст высокє торфовиско. Символом стежкы остала плямиста салямандра. Таблицю выконали і замонтували завдякы дофінансуваню з Лісового Фонду.

Празднуваня Дня Русинів в Польщы уж в тоту неділю

Уж в тоту неділю, 5 грудня/децембра, будеме празднувати 103. річницю фльориньского віче, якє дало початок Рускій Народній Республиці Лемків. 5. грудня/децембра єст і нашым нацийональным святом – Дньом Русинів в Польщы. З той нагоды Стоваришыня «Руска Бурса» в Ґорлицях і Стоваришыня Лемків просят вшыткых до спільного святкуваня. Святкуваня зачнут ся во Фльоринці, жебы в долинці перед плебанійом, де перед роками зобрали ся нашы предкы на віче, вшанувати іх памят і ідею Республикы. Дальша част тогорічного Дня Русинів в Польщы пройде в ґорлицкій Рускій Бурсі. Зачне ся она о 15.00 год. Др Анна Вільк выголосит выклад пн. «Довкола бадань над історийом і достоменністю Лемків». Пак буде артистична част, в якій молода композиторка з чужыны, Дария Текля Кузяк, заграт свій авторскій концерт пн. «Од традициі до сучасности». Сердечні вшыткых просиме до спільного празднуваня.

Джерело фороґрафіі: twitter.com/MSWiA_GOV_PL