Сумар дня на 3. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 3. грудня/децембра 2020 р.

Любіньскій парох просит на молитву за копальників

Kаждого рока 4. ден грудня/децембра є вынятковым дньом, припоминаючым о людях звязаных з копальництвом i iх трудах нелегкой роботы. В тот ден припоминана є памят за копальничый стан. О копальниках в своіх молитвах памятат любіньска православна парохія за справом єй настоятеля, о. Богдана Репелы. 4. грудня/децембра для вшыткых східніх християн то великє свято Введіня во Храм Пресвятой Богородиці. Вірныма любіньской парохіі є вельох Лемків – копальників, котры роблят в поблизкых майнах міди. На молитву красні просит любіньскій настоятель.

Книжка про лемківскє народне облечыня

Вышла цінна публикация про історию лемківского народного крою. То книжка Юрия Стариньского, ведучого ансамблю Кычера з Ліґниці. Книжка вышла в рамках выдавничой діяльности Малопольского Центру Культуры Сокіл в Новым Санчы як десятый том з сериі пн. «Сандецкы і Ґорлицкы Лемкы, Шляхтівскы Русины». Выданя чыслит понад 300 сторін. В вельох місцях обогачене єст непубликуваныма дотля архівныма знимками з ріжных части Лемковины. Стариньскій вказал материял, якій находит ся м.ін. в музею в Петерсбурґу в Росиі, якій был там вывезеный вчас єдной з експедиций на Лемковині. Автор представлят тіж детальну історию і етапы розвитку лемківского облечыня, котре являт ся єдным з елементів русиньской материяльной спадковины. В книжці найти мож описы поєдных елементів кроів, од білизны по чугы, гуні ци накрытя головы. Вказуваны сут і сучасны фотоґрафіі моделів, котры представляют стары кроі, якы доднес хоронены сут через лемківскы ансамблі і поєдны музеі. Книжка неодолга буде доступна до придбаня, м.ін. за ЛАПіТ Кычера.

Ден Русина як все культурально

В тоту суботу, 5. грудня/децембра, пройде презентация публикациі пн. «Перша ліґа парібків. Лемківскы публицистичны тексты» з текстами авторства Ваня Гунянкы, Петра Медвідя і Богдана Ґамбаля, выдавцьом котрой є Стоваришыня «Руска Бурса» в Ґорлицях. З огляду на епідемічну ситуацию і звязаны з ньом рестрикциі, подія буде заперта для публикы. Просиме позерати на онляйнову трансмісию на фанпейджы радия ЛЕМ.фм та слухати радия ЛЕМ.фм, на антені котрого так само буде проходила трансмісия. Початок 16.00 година. Дата презентациі книжкы не єст припадкова. Як раз того дня празднуєме Ден Русинів в Польщы, схваленый Світовым Конґресом Русинів на памятку основаня Руской Народной Республикы Лемків. Головным пропаґатором і орґанізатором попередніх святкувань Дня Русинів в Польщы был Богдан Ґамбаль, вызначный лідер русиньского соспільства, якого несподівана смерт попереджена коротком хворотом взяла 2. липця/юлия 2020 р. з того світа. За його стараньом повело ся выдрукувати книжку, хоц сам не встигнул єй видіти. Припомнийме – субота, 16.00 год., радийо ЛЕМ.фм.

Костельникова Осін онляйн

27. річник літературного фестівалю войводиньскых Русинів під назвом Костельникова Осін того рока з причыны пандеміі буде проходила онляйн. Рішыл о тым орґанізацийный комітет. Фестіваль того рока проходил буде через три дни од 10. до 19. грудня/децембра і буде го мож обзерати на фейсбуковым фанпейджы Дому Культуры Рускій Керестур. 10. грудня/децембра буде презентувана література для діти. Початок є заплянуваный на 10.00 год. Представлены будут дітячы книжкы од Сашы Паленкаша, Оленкы Жівковічовой, Данієлы Тамаш ци Любиці Фа Гарді. 18. грудня/децембра од 14.00 год. будут представлены книжкы прозы і поезиі для дорослых в авторстві Юлияна Тамаша, Славка Виная, Славка Романа Ронда, але онляйн публика буде мала можніст запознати ся з выданьом історичных текстів Гавриіла Костельника. Третя част літературного фестівалю, котра буде в онляйн высылана 19. грудня/децембра, буде присвячена молодежы і выданям про ню.