Сумар дня на 3. грудня/децембра 2019 р.

Приносиме вам сумар медияльной ґрупы ЛЕМ.фм+ на ден 3. грудня/децембра 2019 р.

Різдвяны Торгы в Кракові

В остатню суботу зачали ся Різдвяны Торгы в Кракові. Подія тішыт ся великом популярністю не лем серед жытелів міста, але і туристів, котры з той нагоды специяльні приізджают на краківскій рынок. Як што рока явило ся вельох выставців з цілой державы та з заграниці, медже інчыма з Литвы, Украіны, Мадяр ци Словациі. Окрем того выставляют ся тіж заприязнены міста Кракова – Львів і Кыів. На Різдвяных Торгах купити мож не лем ручні роблены святочны дарункы, прикрасы на яличкы ци зимове облечыня, але тіж спрібувати реґіональных страв з цілой Малопольщы. Своі выробы продают тіж розмаіты фундациі, м.ін. Caritas Краків, Польскій Звязок Глухых ци Ставляме на Лапы, де дохід з продажы іде на потрібуючых. Сут тіж два стоіска з ремеслом, де вказуют, як робити свічкы і як працувало ся в кузни. В часі ярмаку орґанізуваны сут ріжны подіі, такы як стріча з Миколайом, конкурс на найкрасшый вертеп ци колядковый хоровід. Торг завершеный буде 22. грудня/децембра концертом трьох тенорів, а пак президент Кракова поділит ся з жытелями традицийным оплатком.

Святкуваня ювілею Дутой Оркєстры з Домініковиц

29. і 30. листопада/новембра тр. 20. річницю святкувала Дута Оркєстра з Домініковиц. Основана была в 1999 році і од самого початку аж до днес ведена під дириґентуром Романа Корбича, Лемка знаного з ансамблю Серенча. Членами оркєстры сут жытелі з цілого ґорлицкого повіту. Першый выступ одбыл ся в 2001 році, од того часу мож было іх видіти на ріжного рода кєрмешах, службах і інчых реліґійных і патріотичных подіях на обшыри цілого повіту. Од 2003 рока при оркєстрі діє тіж ґрупа Мажореток, котра выступила разом з більше як 70-особовом ґрупом музиків. В часі концерту мож было чути творы клясичной, популярной і фільмовой музикы, де оркєстра вказала свій высокій рівен. Разом выступили з парохіяльным хором Арка з парохіі святого Йоана Хрестителя в Кобылянці, запрезентувал ся тіж Фольклористичный Ансамбль Бескіды з Домініковиц, веденый тіж Романом Корбичом, а окрем того показ мала Школа Гуляня SHOW DANCE. На конец вручены были нагороды і зложены подякуваня для вшыткых, котры причынили ся до розвитку оркєстры.

Дария Шкурат з Бортного з успіхами

В остатніх змаганях Медженародной Федерациі Лыжного Спорту, якы проходили в Італиі в Santa Caterina, посеред представників польской молодіжной кадры не без причыны нашла ся 15-річна Дария Шкурат, Лемкыня родом з Бортного, котра заняла 5. місце з результатом 17 минут і 9 секунд. Наступна Полька в клясифікациі заняла аж 19. місце. До выграной Дариі бракло лем 34 секунды. На тот час в однесіню до систему Медженародной Федерациі Лыжного Спорту Шкурат ма близко 97 пунктів, што дає єй 7. місце в загальнопольскій клясифікациі, выпереджат ю медже інчыма Юстина Ковальчык та Моніка Скіндер. Результат тот дозвалят зачати дискусию на тему принятя Дариі до кадры дівчат Вєрєтєльный-Ковальчык.

Неодолга буде мож потішыти ся різдвяным співом

Музей Русиньской Культуры просит 17. грудня/децембра на літературно-музичну стрічу під наголовком «Рождество в духовній поезиі Осифа Кудзея і співанках Фольклорного колективу Заруба з Няґова». В часі подіі мож буде по долгій перерві чути творчіст Зарубы і Кудзея, лавреата преміі Александра Духновича, автора байок і духовной поезиі та тлумача літургічных текстів з церковнославяньского до русиньского языка. 20. грудня/децембра в Театрі Йонаша Заборского в Пряшові одбуде ся концерт під наголовком «Христос ся раждає». Цілонічный концерт поділеный єст на дві части, а выполнят го світскы і духовны колядкы. Акция ма за задачу ввести слухача в святочну атмосферу – покоры і задумы. Остатня подія то тіж концерт під назвом «Нова радіст стала», котрый пройде 21. грудня/децембра в Дому Культуры в селі Ігляны. Єст то 3. річник подіі, а того рока выступлят м.ін. ансамбль Рутенія з Братиславы та мужскє тріо з Камюнкы.

Фот. skipol.pl