Сумар дня на 29. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 29. вересня/септембра 2021 р.

Веце токсичных одпадів до вывезіня

За веце як місяц, 15. листопада/новембра, минят термін до коли, згідні з умовом, мают зникнути токсичны одпады з обшыри бывшой Рафінериі Нафты Ґлімар. Фірма з Коженной Mo-BRUK в новосандецкым повіті орґанізує єден з послідніх транспортів з 5000 тон нагромадженых гын небезпечных хімікалий. Вказує ся єднак, што на обшыри бывшой рафінериі є о вельо веце одпадів. Бесідувал о тым уж в часі тырваня досліджыня Славомир Корбеляк, прокуратор Рейоновой Прокуратуры в Ґорлицях. Mo-BRUK є готовый продолжати вывозіня, але аж по підписаню анексу до умовы на векшу кількіст робіт. Бургомайстер Ґорлиц Рафал Кукля ґарантує, што чысло одпадів было бране з експертизы прокуратуры, але кєд буде того веце, то буде зроблена дальша інвентаризация і буде продолжане іх усуваня. Досліджыня в ґорлицкій прокуратурі в справі складуваня небезпечных одпадів є закінчене, а перед Округовым Судом в Новым Санчы фурт тырват процес осмерох оскарженых осіб.

Справа о Стані Республикы

Президентка Словацкой Республикы Зузана Чапутова в віторок, 28. вересня/септембра, выступила в Нацийональній Раді Словацкой Республикы зо свойом Справом о Стані Республикы. Оцінила в ній м.ін. діяня влады, котры мают вести до економічной поправы ситуациі державы, та звернула увагу, што теперішня влада, як нияка інча, має до диспозициі великы фундушы. Підкрислила, што необхідне в тым процесі є ліквідувати реґіональны розділы і социяльны нерівности, котры найвеце видно на пілночы, сході і в центрі Словациі, значыт там, де є великє чысло представників мадярской, ромской і русиньской нацийональных меншын. В своім писмі, котре загнала на XV Світовый Конґрес Русинів, якій проходил в Любовняньскых Купелях в 2019 р., так само однесла ся до реґіональных роділів в контексті меншын. Як товды подала, одхід молодых заграницю або до інчых реґіонів Словациі ослаблят меджепоколіньову трансмісию і підтримуваня свойой языковой і культуровой спадковины.

В Пшемкові плынуло медом і вином

В вікенд 25.-26. вересня/септембра в Пшемкові проходила ХХІ едиция Нижньошлезского Свята Меду і Вина. Дводньова імпреза є нагодом, жебы вшыткы аматоры меду і медовых напитків могли выпрібувати оферту выробників меду з цілой Польщы. В проґрамі было вельо додатковых атракций, як напр. артистичны выступы. І того рока не бракло лемківскых представників на сцені – выступил ансамбль Ластівочка. Традицийом тіж є, што в другій ден проходит екуменічне богослужыня при участи парохів вшыткых місцевых віроісповідань, в котрисым з пшемківскых храмів. Того рока богослужыня проходило в костелі покровы Вознесіня Пресвятой Дівы Мариі. Другій ден Свята Меду і Вина принюс тіж підсумуваня конкурсів на Взірцьову Пасіку, Взірцьову Пасічну Ґаздівку та на найліпшы меды оферуваны вчас стрічы.

В Волівци направили дорогу

В половині вересня/септембра скінчыли ся роботы звязаны з модернізацийом дорогы в селі Воловец. В іх рамках м.ін. положыли дві верствы асфальту, вычыстили ровы, дополнили побоча кыршеным каміньом. Выконавцьом робіт было Дорогово-Мостове Підприємство Ґодром, а кошт то близко 250 тис. зл.