Сумар дня на 29. вересня/септембра 2020 р.

Приносиме вам сумар медияльной ґрупы ЛЕМ.фм+ на ден 29. вересня/септембра 2020 р.

Зліквідували вакацийны курсы на трасі з Санока до Нового Лупкова

Од 21. вересня/септембра не курсуют промоцийны самоурядовы потягы в страну Бєщадів і Низкого Бескіду. Акция тырвала од 6. липця/юлия і пляново мала ся закінчыти з початком вересня/септембра, єднак зо взгляду на заінтересуваня час закрытя сезону перенесено аж о три тыжні. На жаль не повело ся зорґанізувати дальшого, полного фінансуваня перевозів в наступных місяцях. Як зазначыл радник саноцкого повіту Ігор Вуйцяк, фреквенцийны тыжньовы ефекты зачудували аж і найбільшых оптимістів, а верніня желізницьового духа на давно закрыты торы дало велику сатисфакцию заанґажуваным самоурядам. Вакацийный потяг в Бєщады і Низкій Бескід курсувал од понеділька до пятниці, а в вікенды до диспозиці пасажерів был потяг «Вояк Швейк» реляциі Ряшів-Меджелабірці-Ряшів. Цілю акциі было пошырити доступніст реґіональных місц та заохотити туристів одвиджати саноцкій і бєщадскій повіты. Днес самоуряды не потверджают, але тіж і не заперечают, же в будучности зас одкрыты будут желізницьовы получыня до той части Польщы.

5. едиция нагороды ім. Вацлава Буряна

Того рока мало котра культурна подія єст така як плянувано. Подібні было з 5. едицийом нагороды ім. Вацлава Буряна, котра проходила лем в формі онляйн. В понедільок, 28. вересня/септембра, о год. 15.00 на офіцийным фейсбуковым сайті конкурсу проходила трансмісия чытаня вершів номінуваных за поезию, пак была дискусия конкурсовой капітулы і бесіда з лавреатком нагороды за вклад до середньоевропейского діалоґу в обшыри культуры – Моніком Шнайдерман. Стріча з нагородженыма і вручыня нагорід одбуде ся на яр вчас Трієнале Середньоевропейской Штукы орґанізуваного Музейом Штукы. Нагорода ім. Вацлава Буряна признавана є од 2014 рока для упамятніня чешского поеты і тлумача, выріжнят ся творців з Чех, Польщы, Словациі і німецкоязычной Европы. Окремо признавана єст нагорода для особливо заслуженой особы в области діяня для середньоевропейского діалоґу. Є то єдно з ціннійшых культурных выріжнінь в нашій части Европы.

Маґурскій Нацийональный Парк очами молодежы

Маґурскій Нацийональный Парк святкує 25 років істнуваня і з той нагоды зрыхтувал аж два конкурсы. Першый єст плястичный, орґанізуваный уж 15 раз пн. «Картка з Маґурского Парку», направленый єст на учеників основных шкіл. Конкурсовы роботы мают вказувати найліпшы спомины молодых люди з вандруваня по МНП. Роботы оціняны будут в трьох віковых катеґориях – клясы І-ІІІ, ІV-VІ і VІІ-VІІІ. Другій конкурс то нова думка і перша едиция. Направленый єст на учеників середніх шкіл і тыкат ся компутеровой ґрафікы. Задачом єст запроєктувати ювілейну окладинку часопису «МАҐУРА». Праца мусит вказувати особливу красу і захопліня МНП. В обох конкурсах творы треба прислати до 16. листопада/новембра тр. Найліпшы працы мож буде обзерати на поконкурсовій выставі, што одкрыта буде по признаню нагорід, а найліпшы з найліпшых будут проєктами карток і окладинкы. Більше деталів на тему конкурсів найдете ся на офіцийным сайті МНП.

«Лемківска Одисея» на Східній Лемковині

Саноцкій Дім Культуры просит жытелів саноцкого повіту в віку од 30 до 65 років до участи в дармовых театральных варштатах, котры пройдут в днях од 19. до 24. жолтня/октобра. Закінчат ся они поварштатовым показом, што пройде 24. жолтня/октобра о 19.00 год. на дошках Саноцкого Дому Культуры. Режысером пєсы є Войцєх Фаруґа. Спектакль выникнул як ефект театральных стріч, котры проходили влони в Ґорлицкым Центрі Культуры. Варштаты посвячены сут темі культуры і істориі Лемків. З той причыны до участи прошены сут особливі представникы лемківской меншыны або особы заінтересуваны лемківском темом. Театральны варштаты будут ведены згідно з ідейом community theatre, тє. іх основом буде істория членів соспільности, жытелів даной обшыри. Проєкт «Лемківска Одисея. Обізд» реалізуваный єст в рамках проґраму Театр і Танец 2020 Міністерства Культуры і Нацийональной Спадковины.