Сумар дня на 29. січня/януара 2025 р.

Приносиме вам сумар медияльной ґрупы ЛЕМ.фм+ на ден 29. січня/януара 2025 р.

Перше засіданя Рады Влады Словацкой Республикы про Нацийональны Меншыны

В понедільок 27. січня/януара в Братиславі одбыло ся перше засіданя Рады Влады Словацкой Республикы про Нацийональны Меншыны (Рада є высшым орґаном як комісиі і была покликана в місце дотеперішньой Комісиі про Нацийональны і Етнічны Ґрупы). За русиньску меншыну в Раді засідают: Мартін Караш, Петро Медвідь і Мілан Ян Піліп. Засіданя одкрыл премєр Словациі Роберт Фіцо. На засіданю бесідували м.ін. про плян дальшых засідань Рады, про рыхтуваня Рапорту о стані хоснуваня языків нацийональных меншын за період років 2023-2024 (гев вказало ся, што найменьше зворотных інформаций дотерат до міністерства, кєд іде о русиньскы села), в дальшых пунктах бесідувало ся і о проблемах меншынового фонду, ситуациі нацийональных музеів ци черговых леґіслятивных процесах, тыкаючых меншынового закону. Найвекше порушыня принесла єднак дискусия о плянуваным признаню владом Словацкой Республикы новой нацийональной меншыны – Ґуралів. Влада має тото приняти днес на своім засіданю в Червеным Кляшторі. Зо страны Рады проти резолюциі, котра тот плян підпорит, была головні передставничка польской меншыны – Катажына Івона Бєлік. Подала, што подібне становиско має і польска амбасада, неґативне становиско представлят і Міністерство Внутрішніх Справ і Адміністрациі. Рада не была згідна за принятьом в тій справі єдного становиска.

Бачваньскы Русины одпразднували ден св. Савы

Русиньскы школы в Сербіі торжественныма академіями одсвяткували в понедільок 27. сінчня/януара ден Шкільной Славы – то свято в памят св. Савы, покровителя шкільных інституций. В Рускым Керестурі принагідну академію зрыхтували школярі основной і середньой школы «Петро Кузмяк» – был выступ хору, а тіж вінчуваня од директоркы школы Наталиі Будинскі. Святочны академіі вызвучали тіж в Дюрдьові в школі «Йован Йованович Змай» ци в Коцурі в школі «Братство єдинство». В Дюрдьові православны священникы о. Радоє Маркович і о. Александер Симетич посвятили шкільну ікону, выступил шкільный хор, ученикы припомнули жывот св. Савы, деклямували вершы. Подібный проґрам вызвучал і в Коцурі. Директорка місцевой школы Сенка Мученскі припомнула значыня св. Савы для освіты і едукациі, выступили фольклористичны дітячы ансамблі «Жатва» і «Завычайне врело». В звязку з тым, же св. Сава постеріганый є за творцю сербской середвічной літературы і покровителя едукацийных інституций, його роля в розвитку шкільництва і едукациі в Сербіі была вельократно підкрисляна.

Ліпша охорона перед огньом в Вапенным

24. січня/януара в Уряді Ґміны Санкова підписали порозумліня, котре влучат єдиницю Охотничой Протиогньовой Стражы в Вапенным в Державный Систем Ратовничый і Гашыня Огня. Порозумліня підписали війт Ґміны Санкова, повітовый комендант Протиогньовой Стражы в Ґорлицях та передставникы Охотничой Протиогньовой Стражы в Вапенным. Згідні з обовязуючыма переписами, підписане порозумліня то першый крок до выданя Головным Комендантом Державной Протиогньовой Стражы рішыня влучыти єдиницю з Вапенного в структуры систему, што тіж вяже ся з выполніньом шору вымагань што до перешколіня ци выпосажыня.

Фот. Awit Szubert – Magazyn Tatrzańskiego Parku Narodowego [1], Domena publiczna