Сумар дня на 29. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 29. серпня/авґуста 2024 р.

Грекокатолицкє поломництво на Святу Гору Явір

99 років тому трьом Лемкыням на Горі Явір над Высовом обявила ся Пресвята Богородиция. З нагоды дальшой річниці, вірны грекокатолицкой Церкви орґанізуют піше поломництво, якє перейде з Пряшівской Руси на Лемковину – до каплиці в тым святым місци. Поломникы выйдут ден перед річницьом – 7. вересня/септембра о 9.00 год. спід каплиці Рождества Пресвятой Богородиці в Ґабольтові на Словациі. В самым Ґабольтові поломникы зайдут і до місцевого римокатолицкого костела. Дальшым пунктом буде русиньскє село Цигелька, де поломникы зайдут до місцевой грекокатолицкой церкви свв. Космы і Даміана (о 17.00 год. в храмі буде одслужена вечырня). Орґанізаторы припоминают, што поломникы повинны мати одповіднє облечыня, а тіж основны документы – в разі граничной контролі. Істория обявлінь на Святій Горі Явір сігат 8. вересня/септембра 1925 р.

Підпорте лемківску оперу «Голос»

Лемківска опера «Голос» то проєкт композиторкы Дариі Кузяк і першый в істориі синкретичный твір, котрый лучит в собі сучасну музику з лемківском народном музиком і електроніком. Опера оповідат про дві сестры, котры розділила доля, а туга пхат іх в свою страну. Сценічна презентация закладат участ двох вокалисток, лемківской капелі, оркєстры з дириґентом, танцюристів з лемківского ансамблю Пісні і Танця «Кычера» і сучасных. Разом в творіню лемківской оперы возме участ близко 60 осіб. Твір має шансу на свою премєру іщы того рока в листопаді/новембрі в Нацийональным Форум Музикы во Вроцлаві, єднак до реализациі так великого проєкту потреба тіж великых грошів. Ансамбль Кычера на реазлизацию проєкту отримал дофінансуваня Міністра Культуры з проґраму Музика, не єст оно єднак выстарчаюче, жебы покрыти вшыткы кошты оперы. З той причыны композиторка і думкодавчыня оперы Дария Кузяк заложыла колекту на сайті zrzutka.pl. Цілю єст зобрати бракуючу квоту 48 тис. зл. Припоминаме, што охочы підперти збірку найдут ю через вписаня на сайті zrzutka.pl «Premiera łemkowskiej opery „Hołos”. Першы пробы до премєры уж ся зачали.

Успеньскій одпуст в Чырчу

В вікенд 24.-25. серпня/авґуста в грекокатолицкій парохіі Чырч на Марияньскій Горі одбыл ся одпуст з нагоды праздника Успіня Пресвятой Богородиці. Проґрам свята зачал ся суботу процесийом од храму, посвячыньом воды при джерелі, молитвом ружанця і великом вечырньом з літийом, в рамках котрой поклала ся плащанниця Пресвятой Богородиці до гробу. Завершыньом суботнього дня была торжественна архієрейска літургія, котрой головным служытельом был Высокопреосвященый Йона Максим, пряшівскій архієпископ і митрополита. По літургіі была панахіда за о. Мирона Подгаєцкого, котрый вызначно записал ся до істориі той парохіі, а має там і свій музей. В неділю головну літургію одслужыл архімандрита Марко Дурляк.

Выстава «Чаро Депозиту» в МРК в Пряшові

Словацкій Нацийональный Музей – Музей Русиньской Культуры в Пряшові оголосил о дальшій подіі орґанізуваный в його просторах. 17. вересня/септембра буде фінісаж выставы під назвом «Чаро Депозиту», в рамках котрой мож видіти ріжны русиньскы кроі. Окрем того в тот ден одбуде ся презентация книжкы Елены Сотаковой під наголовком «Выход з крою». Ціліст буде посявчена як раз істориі русиньского народного облечыня. Подія зачне ся в музейных просторах о 16.00 год.