Сумар дня на 29. мая 2023 р.

Приносиме вам сумар медияльной ґрупы ЛЕМ.фм+ на ден 29. мая 2023 р.

«Ластівочка» лавреатом Нагороды ім. Оскара Кольберґа.

Лемківскій Ансамбль Пісні і Танця «Ластівочка» был оголошеный лавреатом 48. едициі Нагороды ім. Оскара Кольберґа. Ансамбль был оціненый в катеґориі для фольклорных ґруп. Нагорода ім. Кольберґа являт ся єдном з найважнійшых признаваных в Польщы за заслугы для народной культуры. Орґанізатором шторічных выборів єст Міністер Культуры і Нацийональной Спадковины. Конкурс і святочна ґаля реализуваны сут м.ін. Нацийональным Інститутом Музикы і Танця. Єст то найстарше того рода выріжніня, встановлене іщы в 1974 р. В тым престіжным конкурсі уж перше были доцінены лемківскы гудакы, м.ін. ЛАПіТ «Кычера» з Ліґниці здобыла оцініня в 2019 р. Тепер о Нагороду ім. Кольберґа збогатит ся колекция Ластівочкы, основаной при Кружку Стоваришыня Лемків в Пшемкові. Як інформувал ведучый Кружка, Євген Габура, офіцийне переданя нагороды одбуде ся 12. липця/юлия о 14.00 год. на Королівскым Замку в Варшаві. Більше про ансамбль і оцініня прочытате в дописі на нашым портали.

Др. габ Штефан Дудра отримал званя професора

Представник лемківской меншыны в Спільній Комісиі Уряду та Нацийональных і Етнічных Меншын др. габ Штефан Дудра 8. мая тр. рішыньом Президента Польской Республикы отримал званя професора социяльных наук в дисциплині наукы о політиці і адміністрациі. Проф. Штефан Дудра єст директором Інституту Наук о Політиці і Адміністрациі Зеленогірского Університету, єст членом Комітету Політичных Наук Польской Академіі Наук. Кєрує Працовньом Бадань над Нацийональныма і Етнічныма Меншынами. Єст автором 8 моноґрафій, науковым редактором парунадцетьох книжок, автором і спілавтором понад 200 дописів і розділів в збірковых моноґрафіях. В великій мірі його працы тыкают долі лемківской меншыны в Польщы і ріжных аспектів фунґуваня Польской Автокефальной Православной Церкви. Представником лемківской меншыны в Спільній Комісиі єт од 2014 рока.

PULS глядат новых членів

Єдиный в світі професийный русиньскій ансамбль PULS глядат новых членів до свого танцювального колективу. В середу 7. червця/юнія в балетній сали PULS-у в Театрі Йонаша Заборского в Пряшові мож буде взяти участ в конкурсі на позицию танцюристы або танцюристкы ансамблю. Ґрупа вымагат од кандидатів высокого рівня народного танця і основ клясичного танця.

«Бескід без кіту» в Мазярскій Загороді в Лоси

В суботу 10. червця/юнія в Мазярскій Загороді в Лоси мож буде видіти спектакль «Бескід без кіту», якій заграт Вельопоколіньова Театральна Ґрупа Племя з Устя Руского. Пєса возникла в 2021 р. на основі книжкы «Бескід без кіту» авторства Мариі Стшелецкой, печатаной выдавництвом Libra PL. Театральном опікунком ґрупы і авторком сценария єст Моніка Бабуля, о музичну оправу задбал Мирослав Боґонь, а вокально рыхтувала ґрупу Юлия Дошна. Місце акциі пєсы то давне лемківскє село в 60. роках ХХ столітя. Молоде дівчатко одвиджат бабцю Теклю, Лемкыню, котра оповідат о традициях і вчыт лемківскых пісен. Бесідує о тяжкій доли лемківского народу, котрый был змушеный лишыти свою землю в 1947 р. в рамках акциі «Вісла». Ґрупа Племя іщы перше одвидит з пєсом «Бескід без кіту» Варшаву, де выступит уж в тоту неділю 4. червця/юнія.