Сумар дня на 29. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 29. лютого/фебруара 2024 р.

Транспортове выключыня є і на Лемковині

UNICEF звертат увагу на явиско тзв. транспортового выключыня в Польщы. Чом о тым інформуєме? Зато, што проблем тот видимо дотыкат і Лемковины, кєд же автобусовых получынь до дакотрых сел є мало, або такой неє іх нияк. Явиско тото насилило ся вчас пандеміі, але початок треба брати в 90. роках ХХ ст., коли ліквідувано автобусовы ци желізницьовы получыня. В наслідсві того днес вельо діти і молодых осіб одчуват поважны проблемы в звязку з ограничыньом можливости переміщаня ся по реґіоні свого прожываня – так є в даякых реґіонах Лемковины, де автобусы нияк не ходят, або в невеликым чыслі. Як зазначат UNICEF – особы, якы не годны доізджати зо своіх місцевости, самособом не можут корыстати в тзв. позалекцийных занятях, часто не можут выбрати школы, котра находит ся в далекым повітовым місті, ци не можут корыстати з культурной і спортово-рекреацийной оферты. UNICEF Польща выступує як раз з апельом до Міністра Інфраструктуры о діяня для протидіяня транспортовому выключыню серед діти і молодежы. Зміст апелю доступный є на сайті unicef.pl.

Підкарпатскє вовідство помогло ПСК

По землетрясіню з жолтня/октобра минулого рока, словацкому Пряшівскому Самосправному Крайови (ПСК) помагат і польскє підкарпатскє воєвідство. В тых днях соймик воєвідства схвалил фінансову поміч в сумі 140 тис. евро. Тоты грошы мают помочы одсторонити шкоды в Выгорлятскым Музею в Гуменным і в Піддукляньскым Освітнім Центрі в Свиднику. Іде о културны інституциі, котры сут заряджуваны ПСК. В Гуменным землетрясіня спричынило великы шкоды – попукали стіны внутрі Музею і на зовнішніх фасадах. Єднакы проблемы має по землетрясіню і Піддукляньскій Освітній Центр в Свиднику. Ярослав Макатура, якій є підпредседом ПСК, высловил подякуваня для підкарпатского воєвідства. Бесідуючы тоты слова до маршалка Владислава Ортиля, зазначыл, што тота поміч вказує, як міцне і важне є партнерство обоіх єдиниц.

Польковиці рыхтуют розвиток сіти оптичного світловоду

Неодолга зачнут ся роботы повязаны з прилучыньом до сіти оптичного світловоду шестьох сел і двох обшыри в Польковицях – інформує о тым ґміна Польковиці. В тій ціли ґміна оголосила конкурс і до 11. марця жде на оферты од выконавців. В рамках проєкту сіт має быти допроваджена до сел Бєджыхова, Доброва, Коморникы, Пєшковєц, Тарнувек і Желізный Міст, а в самых Польковицях на осіля Полянка і ул. Войска Польского. По підписаню умовы выконавця буде мал 18 місяців, жебы завершыти інвестицию. Ґміна на проєкт протидіяню тзв. цифровому выключыню перезначыла 6,5 мілинона зл.

Пряшів має шансу на званя «Европейского Міста Спорту 2025»

Місто Пряшів старат ся о званя «Европейского Міста Спорту 2025». Рік 2025 є ідеальный на кандидатуру для міста, прото же товды місто буде гостило Чемпіонат Европы в футболи грачів до 21 років. Змаганя мали бы ся одбыти на новым стадийоні Futbal Tatran Aréna, котрый є найвекшом інвестицийом до гры в істориі Пряшова. Посланці містецкого уряду на 12. засіданю приняли пропозицию кандидатуры на честный титул медженародного званя «Европейскє Місто Спорту 2025». Пріматор Пряшова Франтишек Ольга є переконаный, же місто має вшыткы приметы, жебы званя здобыло.