Сумар дня на 29. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 29. листопада/новембра 2022 р.

Як Свидник радит собі в часі енерґетичной кризы?

Як інформувала аґентура TASR, місто Свидник підняло крокы в звязку з енерґетичном кризом. Школам і предшколям заряджаным містом приказали шпарувати. Хоц місто купує енерґію за добру ціну, а контракт має іщы на два рокы, то уж тепер думат на будуче. Зато школы отримали інструкциі, жебы шпарувати електричну енерґію, але жебы не принесло то шкоды для комфорту учеників. Як передала пріматорка Свидника Іванчова, місто ставлят на модерны і еколоґічны розвязаня, такы як выміна електричной інсталяциі ци освітліня на енерґоощадне. Підписаный был і контракт на будову зеленой стріхы. І сам уряд шпарує, так як вшыткы самосправы на Словациі стягли топліня. Кінцьом жолтня/октобра в місті одкрыли зимный стадийон. Подля Іванчовой кошты утриманя незакрытого обєкту были за великы, особливо тепер при теплых зимах, атракция не діяла ани два місяці. Одраз видно ощадніст на електричній енерґіі. Власти міста надіют ся, што выдаткы звязаны з ведіньом стадийону даст ся покрыти як раз з зашпаруваного. Додатково надіют ся, што по новым році місто отримат дофінансуваня на утриманя спортовых місц.

Загальнопольска Стріча Едукацийных Загорід

21. і 22. листопада/новембра проходила в Кракові VII Загальнопольска Стріча Едукацийных Загорід. Участ в ній брали і представникы Лемківской Едукацийной Загодоры в Ґладышові – Йоан і Данута Дзюбины. Конференция была реализувана в рамках Операцийного Пляну Державной Сіти Сельскых Обшыри на рокы 2022-2023. Подія тырвала два дни, в часі котрых участникы могли выслухати прелекций м.ін. на тему едукациі в загороді ци модерных способів ведіня загороды, але тіж могли вымінити ся досвідом і знаньом. Была то і нагода, жебы підсумувати 10 років працы Загальнопольской Сіти Едукацийных Загорід.

Єдиниці з ґорлицкого повіту школили ся в Шымбарку

В суботу, 26. листопада/новембра, в Шымбарку прошло пожарниче школіня. Його тема обнимала ратівничы діяня і гашыня пожару церкви Рождества Пресвятой Богородиці, што спричыненый был – подля сценария – вдаріньом перуна. Цілю орґанізаторів школіня было головно скоординувати процедуры спілпрацы єдиниц Охотничой Протиогньовой Стражы і інчых спілпрацуючых з обшыри ґміны Ґорлиці, а тіж познати специфіку обєкту, стан доіздовых доріг ци систем алярмуваня, пожарникы провірили і діяня протиогньового ґратя обєкту. Участ в школіню взяло щіст єдиниц з околиц Ґорлиц, а орґанізатором маневрів был Заряд Ґмінного Одділіня Звязку ОПС ПР в Ґорлицях.

Жытелі ґміны Солина вказали, як выглядало бойківскє весіля

В остатній вікенд листопада/новембра в Музею Духовой і Материяльной Культуры Бойків в Мычковцях орґанізувана была подія, де одтваряли бойківскє весіля. Весільну інсценізацию запрезентували на основі записків етноґрафа Оскара Кольберґа, котрый занимал ся тіж і утырваляньом лемківской культуры. Додатково своі материялы удоступнил тіж Музей Народного Будівництва в Саноку. Ціліст дополнили спомины мешканців околичных сел. В інсценізациі взяли участ жытелі ґміны Солина. Орґанізаторы задбали, жебы як найдокладнійше вказати традициі і заанґажувати слухачів до активной участи в весілю.

Вертат потяг Краків-Ясло-Краків

Добра відоміст для вшыткых подорожуючых з околиц Ґорлиц. В пятницю, 2. грудня/децембра, зас зачне діяти безпосереднє желізницьове получыня з Кракова через Ґорлиці до Ясла. Од 2. до 9. грудня/децембра потяг стартувал буде в пятниці з Кракова о год. 18.05, а од 11. грудня/децембра до 10. марця 2023 р. о год. 17.50. В другу сторону – зо стациі Ґорлиці Заґужаны одізджал буде в неділі о год. 19.11. Вынятково в тоту неділю, 4. грудня/децембра, потяг піде до Кракова о год. 19.30.