Сумар дня на 29. липця/юлия 2022 р.

Приносиме вам сумар медияльной ґрупы ЛЕМ.фм+ на ден 29. липця/юлия 2022 р.

Спілпраца медже Русинами

Вчера, 28. липця/юлия, делеґация редакторів Медияльной Ґрупы ЛЕМ.фм – Петро Медвідь, шефредактор радия ЛЕМ.фм, і Демко Трохановскій, заступник ведучого Руской Бурсы, стрітили ся в Новым Саді з представниками русиньскых інституций в Войводині: др. Борисом Варґом, шефом Новинарско-Выдавничого Інституту «Руске Слово», Сашом Сабадошом, шефом Заводу за культуру войводиньскых Русинів, і Оленом Папуґа, державном секретар Міністерства про людскы і меншыновы права та социяльный діалоґ. Будучы на місци, бесідували м.ін. о затисніню медияльной спілпрацы з русиньскыма редакциями в Сербіі і вымінили ся досвідчынями з проведеных в Польщы і на Словациі повселюдных списів в 2021 р. Кєд же повселюдный спис в Сербіі одбуде ся аж того рока на осін, русиньскы лідеры з Войводині задеклярували в своій кампаніі схоснувати ґрафічну візуализацию, яка присутна была в єднорідным виді при списовых кампаніях на Словациі, Мадярах, в Польщы, Хорвациі і Чехах.

Транскарпатія

3. серпня/авґуста 2022 рока в Креници, в Парку Нітрібіта, одбуде ся концерт, представляючый проєкт Транскарпатія, якого автором являт ся Михал Кайди, композитор і творця. Транскарпатія то – як сам автор повідат – музичны образы, звуковы імпресиі з Лемковины і Бескідів, імпровізацийна музика без нот. Описуючы своі творы бесідує, же твір «Вітер». Михал Кайди інспірує ся тіж Лемковином і єй складном історийом. В проєкті Транскарпатія берут участ, окрем композитора, Ева Мікульска – контральт, солистка Камеральной Оперы в Варшаві, піяніста Анджей Мікульскі і Сергій Марчук – саксофоніста.

М. Мончак, О. Дуць-Файфер, музика, поезия

О ден скорше, як концерт Мариюша Мончака в рамках VII Медженародного Фестівалю при Джерелах в каплици на Святій Горі Явір, пройде концерт в Ґорлицях, в рамках того самого же фестівалю. «Музичнa епітафія», як звучыт наголовок музично-словного концерту, орґанізувана є з нагоды 80. річниці ліквідациі ґорлицкого ґетта та 75. річниці Акциі «Вісла». Подія одбуде ся в Ґалериі Штукы Двір Карвациянів і Ґладышів в Ґорлицях. Соло на гушлях выступит Мариюш Мончак, проф. Олена Дуць-Файфер буде рецитувала позеию, зато Ева Мончак даст вводне слово. Концерт заплянувано на 18.00 год. заран, т.є. в суботу 30. липця/юлия.

Фот. Рускє Слово