Сумар дня на 29. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 28. квітня/апріля 2021 р.

«Поетицкы Мосты» кличут лемківскых творців

Початком червця/юнія пройде друга едиция Медженародного Віртуального Фестівалю Поезиі «Поетицкы Мосты». Орґанізатором подіі сут Асоцияция SLINKTYS та поетицка ґрупа «Нова Віленьска Аванґарда». Поетицкы Мосты з сідибом в Вільні орґанізуваны будут другій раз, фестіваль пройде в днях 5.-12. червця/юнія. Того рока до участи прошены сут поеты нацийональных меншын та іміґрацийных спільнот, авторы, якы не жыют в середовиску свого материньского языка. Орґанізаторы сердечні просят лемківскых творців. Праві цілый проґрам фестівалю пройде віртуальні. 12. червця/юнія одбуде ся відеоконференция з поетами з заграниці. На 8. червця/юнія заплянували дискусию на тему «Ци легко творити в материньскым языку в інчым языковым середовиску?», яка модерувана буде литовском поетком Лаймом Вінс (Laima Vincė).

ПСК вєдно з Карпатскых Еврореґіоном в Польщы

Пряшівскiй Самосправный Край підписал договор з далшыма успішныма внескодавцями о фінансовый вклад на індивідуальны мікропроєкты черезграничного партнерства з Карпатскым Еврореґіоном в Польщы. В рамках словацко-польской спілпрацы буде реализуваных шіст мікропроєктів в сумі веце як 208,000 евро. Три сут заміряны на охорону і розвиток природной культурной дідовизны і три на освіту в приграничній обшыри. Внескодавцями были Крайскій Музей в Пряшові з одділінями в Стропкові і Ганушівцях над Топльом, Словацкій Червеный Крест, місто Великій Шариш, Словацкій Технічный Музей, Лісы Словацкой Республикы та дальшы.

В Збойным амуніция з ІІ світовой войны

Выкоповы роботы в русиньскым селі Збойне, меджелабірского окресу, в неділю принесли несподіванку. При родинній хыжы 23-річный мужчына з Гуменного нашол незнану част амуніциі. Як інформувала пряшівска крайска поліция, на місце был высланый поліцийный патроль, котрый місце забезпечыл аж до приходу піротехніка. Вказало ся, же ішло о воєнну амуніцию з періоду ІІ світовой войны, конкретно невыстріленый патрон 88 мм до протитанкового ракєтомету. Щестливо никому нич ся не стало.

Стріча спілведучых СКУтНіЕМ

В віторок, 27. квітня/апріля, віцеміністер Блажей Побожый і Григорий Курпиянович, якы сут спілведучыма Спільной Комісиі Уряду та Нацийональных і Етнічных Меншын, стрітили ся в просторах Міністерства Внутрішніх Справ і Адміністрациі, жебы провести бесіду посвячену ситуациі нацийональных і етнічных меншын. Дискусия тыкала задач звязаных з охороном і розвитком культуровой достоменности меншын. Участникы бесідували тіж про принципы даваня дотаций на задачы в 2022 р. На стрічы підчеркнуло ся, што важном справом в квестиі охороны меншын і іх розвитку єст орґанізация вчыня меншыновых языків, істориі і культуры. В стрічы брала участ Марийоля Абкович, членкыня СКУтНіЕМ і репрезентантка караімской меншыны.