Сумар дня на 29. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 29. квітня/апріля 2020 р.

Одкрыли літній сезон на замку Любовня

В неділю, 26. квітня/апріля, одкрыли на замку Любовня літній сезон. Зробили тото інакше як все, але згідні з теперішнім трендом выкликаным обставинами – онляйново. Одкрытя сезону 2020 зачали од трансмітуваня римокатолицкой службы, котру одправили в капличці св. Михала Архістратига, яку іщы в 1647 р. збудувал спишскій староста і найбогатшый маґнат Польского Королівства Станіслав Любомирскій. На тот час сой Любовняньскій Музей робит ревізию збіркового фонду з приблизно 26 тис. артефактів. Музей обнимат 42 обєкты, медже нима є палац Любомирскых з періоду барока, котрый недавно реконструували і котрый жде на колявдацию. Одкрытя музеів і ґалерий на Словациі буде проходило в третій фазі увільняня рестрикций. Дата не є іщы відома. Єден з найславнійшых музеів Словациі, якым є Любовняньскій Музей, буде стоял перед великом вызвом, подля слів його директора Далібора Мікулика, в минулым бо році музей візитувало 214 тис. туристів. Того рока певністю такого чысла ся не осягне, бо на самым зламі мая і червця/юнія денно до музею приізджало 20 автобусів зо шкільныма прогульками. Директор бесідує, што змінят експозицийны трасы і іщы барже заміряют ся на індивідуальны турнусы.

Мож си скупити част образу Варголя

Явила ся американьска компанія Masterworks.io, котра дозвалят інвестувати в фалаткы творів знаных малярів. За посередництвом єй порталю мож стати ся спілвластительом образу авторства Енді Варголя ци Пабля Пікассо. Masterworks.io підкрислят, што купує лем тзв. «blue chips», значыт образы, котры вышли спід рук найзнаменитшых малярів. Фірма Masterworks.io покликує до жытя специяльну компанію ціли, зареґіструвану в штаті Делавер, до придбаня каждого поєдного образу. Тота компанія купує образ, нич інче. По продажы твору штукы заперают ю. Хоц думка, же єст ся властительом образу Варголя, може быти спокусом, то ризико інвестициі через вебову фірму є дост великє. Головні зато, што фірму Masterworks.io, котра свою сідибу має в Ню Йорку, не контролюют. На єй сайті є комунікат, што компанія не єст ліценцийонувана Урядом Реґуляциі Фінансового Промыслу, окрем того пишут тіж, што іх бізнесовый модель єст новый, што рынок штукы має то до себе, же выходжыня з інвестициі може долго тырвати ци што неє ґарантиі, же буде можніст одпродати участ в образі, або же образ може быти проданый зо стратом.

Театры в Новици аж в вересни/септембрі

Орґанізаторы шторічного театрального фестівалю Інновиця Пьотр Бусольд і Матеуш Сора выдали офіцийный комунікат про зміну терміну акциі. Як подают, епідемічна ситуация і звязаны з ньом ограничыня змусили іх перенести термін подіі з долгого вікенду в червци/юнію, в якым празднуване єст свято Боже Тіло, на термін 4.-5. вересня/септембра. Додатково мусіли фестіваль скоротити лем до 2 днів. Орґанізаторы надіют ся, што товды буде мож ся стрітити в уж «нормальнійшых» обставинах.