Сумар дня на 28. червця/юнія 2022 р.

Приносиме вам сумар медияльной ґрупы ЛЕМ.фм+ на ден 28. червця/юнія 2022 р.

Ґміна Ґорлиці має ся чым похвалити

Сельскій Кружок Ґаздынь з Кобылянкы нашол ся в найліпшій трійці в конкурсі о Нагороду Жены Президента Польщы. Пілфіналы змагань прошли в неділю, 26. червця/юнія, в Отрембусах в будинку Нацийонального Народного Ансамблю Пісні і Танця Мазовше. Ґаздыні з Кобылянкы змагали ся з 15 інчыма кружками, з каждого воєвідства по єдным. Конкурсовом задачом было запрезентувати стравы і традициі звязаны з темом тогорічньой едициі, значыт Пущаньом. Додатково кажда ґрупа представляла коротку сценку навязуючу до Пущаня. Разом з ґаздынями з Кобылянкы поіхал війт ґміны Ґорлиці Ян Пшыбыльскій, котрый не лем помагал, але тіж брал активну участ в презентациі реґіону. Поза кружком з Малопольщы на подіюм нашли ся іщы репрезентациі люблиньского і свєнтокшыского воєвідств. О тым, котре докладні місце заняла кажда з трьох выріжненых ґруп, дознают ся аж в вересни/септембрі в часі президентскых дожынок. Ґрупа з першым місцьом буде мала нагоду гостити в себе Першу Даму.

Малопольскій Уряд дофінансувал полудньову част воєвідства

24. червця/юнія в Ґалицийскым Місточку маршалок Малопольщы офіцийно вручыл представникам новоторжскій, татряньского, лимановского, новосандецкого і ґорлицкого повітів символичны чекы на реализацию задач в рамках проєктів «Меценат Малопольщы», «Охорона забытків», «Малопольскы Капличкы» і «Малопольскы хоры». Ґорлицкій повіт може ся похвалити найбілшым дофінансуваньом в двох проєктах: «Малопольскы хоры» і «Охорона забытків Малопольщы», завдякы грошам пройде консервация м.ін. XVII-вічного олтяря в церкви св. Параскєвы в Чырній. Высокє дофінансуваня трафило до ґорлицкого повіту тіж з проєкту «Малопольскы капличкы 2022». Грошы підут на реновацию м.ін. двох обєктів з Лемковины, єдного в ґміні Устя Рускє в селі Ганчова, а другого в ґміні Санкова в Бодаках.

«Етноварштаты в Лопянці» уж ся зачали

Днес зачынат ся першый етап проєкту «Етноварштаты в Лопянці», реализуваного Карпатскым Товариством. Проєкт має на ціли ратувати материяльну і духову спадковину творену на обшыри Бєщадів од віків прожываючыма там Поляками, Лемками, Бойками і Жыдами. Варштаты направлены сут на локальну соспільніст. Першый етап задачы пройде під гослом «Давна штука будуваня без заправы» і направленый єст на дорослых участників. В часі варштатів охочы будут мочы запознати ся м.ін. зо способами выдобываня каменя, працы над ним ци примірами реліктів будуваных без заправы в Лопянці. Друга част проєкту пн. «Стріча з жывом традицийом» пройде в вересни/септембрі і направлена єст на діти і молодіж з з ґмін Тисна, Балигород і Солина.

Разом з вакациями вернули вакацийны потягы

Од 25. червця/юнія в кажду суботу і неділю зас іздит «Вояк Швейк». Припоминаме, што потяг выізджат з Ясла і доізджат аж до словацкых Меджелабірців, а по дорозі мож высісти м.ін. на стациях в Бєщадах. Додатково в найблизшу суботу, 2. липця/юлия, вертат получыня «Włóczykij» з Ясла до Крениці і буде курсувал аж до кінця вакаций. Так як і в попереднім році на подорожуючых тым потягом ждал буде безплатный автобус, котрым мож буде доіхати до єдной з найбарже знаных креницкых атракций, до видоковой вежы. Білет з потягу «Włóczykij» дає право тіж до 10% знижкы на ріжного рода атракциі, котрых список находит ся на страні Креницкой Туристичной Орґанізациі.