Сумар дня на 29. червця/юнія 2021 р.

Приносиме вам сумар медияльной ґрупы ЛЕМ.фм+ на ден 29. червця/юнія 2021 р.

В Меджелабірцях одкрыют найбільшу музейну експозицию на тему І світовой войны в Словацкій Республиці

Місто Меджелабірці просит на посвячыня цмонтеря з періоду І світовой войны з памятником «Delo» та торжественне одкрытя найбільшой музейной експозициі на тему І світовой войны в Словацкій Республиці. Подія пройде в пятницю, 2. липця/юлия, в рамках проєкту «Культурова спадковина карпатской обшыри в новій перспективі». Зачне ся о 12.00 год. аеропляновым показом Войсково-Повітряных Сил Словацкой Республикы, пак пройде посвячыня цмонтеря і панихіда при памятнику за вмерлых вояків. О 13.00 год. в домі культуры одбуде премєра фільму «Меджелабірці 1914/1915 – забыты памятникы». Одкрыта буде і нова постійна експозиция пн. «Карпатскій Фронт – Меджелабірці 1914/1915», а на конец буде концерт войсковой музикы.

Василь Ябур достал Прибинів Крест ІІІ клясы 

27. червця/юнія Василь Ябур отримал од президенткы Словацкой Республикы Зузаны Чапутовой Прибинів Крест ІІІ клясы за вынятковы заслугы для розвитку Словацкой Республикы і за заслугы при кодифікациі русиньского языка. 24 нагороды были вручены з нагоды 28. річниці выникнутя Словацкой Республикы. Тота подія традицийні одбыват ся в січни/януарі, але того рока была перенесена на червец/юній з причыны пандеміі. Хоц Василь Ябур не першый раз отримал нагороду за свою працу над кодифікацийом та розвитком русиньского языка, то стал першым русиністом, якій отримал нагороду од президента республикы за свою працу в обшыри русиністикы. По професиі єст языкознавцьом і учытельом, кодифікацийом русиньского языка зачал ся занимати на початку 90. років ХХ ст. Більше о нагородженым і преміі чытайте в статі на нашым портали.

Beskidnik, Beskidzki podróżnik, Łemkowyna ци Włóczykij, як буде ся называл новый потяг з Ясла до Крениці?

Уж в найблизшу суботу, 3. липця/юлия, з желізницьовой стациі в Яслі в свій інавґурацийный переізд піде потяг до Крениці. З той нагоды орґанізация Kolej na Jasło зорґанізувалa конкурс. Жебы взяти в ним участ, треба войти на офіцийный фейсбуковый сайт Kolej na Jasło і выбрати єдну зо штырьох пропозиций, як може ся называти новый потяг. Пропонуваны назвы то Beskidnik, Beskidzki podróżnik, Łemkowyna і Włóczykij. Свій выбір треба написати в коментари під постом разом з місцьом, до якого ся хоче поіхати, а котре ся находит на трасі потягу. Назва, котра отримат найбільше зголошынь, буде запропонувана Малопольскій Желізници, а 10 найбарже креативных одповіди буде нагородженых зоставами зрыхтуваныма Містецкым Урядом в Яслі та малопольскым перевозником. Голосувати можна іщы лем днес.

Ансамбль Кычера репрезентує Польщу на Медженародным Фестівалю Гуляня в Ґожові Великопольскым

В Ґожові Великопольскым тырват XXVI Медженародный Фестіваль Гуляня «Folk Harbor». Подія зачала ся в суботу, 26. червця/юнія, і тырвала буде до четверга, 1. липця/юлия. В неділю прошол конкурсовый концерт, але зо взгляду на пандемію в гыбридовій формі – част ансамблів выступила в Ґожові, а част запрезентувала ся віртуальні. В конкурсі взяло участ 14 ґруп з ріжных держав, а серед них был Лемківскій Ансамбль Пісні і Танця «Кычера». Фестіваль закінчыт ся ґальовым концертом, котрый мож буде обзерати нажыво або через YouTube.