Сумар дня на 28. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 28. жолтня/октобра 2022 р.

Образ Никыфора осягнул рекорову ціну

Предвчера, в часі авкциі в столичній Piękna Gallery ліцитуваный был малюнок єдного з найвызначнійшых лемківскых артистів, Никыфора – Епіфана Дровняка. «Монідло» єст єдном з найвекшых рідкости, якы ся явили в остатнім часі на рынку. Образ был намалюваный на полотні і єст більшый од типовых творів маларя. Унікатове «Монідло» осягнуло рекордову ціну 120 тис. злотых. Образ был ліцитуваный од порога 40 тис. злотых, што значыт, же фінальна ціна перебила стартову ціну аж о 300%.

Консервация церкви в Рудній

Православна Парохія Воздвижыня Честного Креста в Рудній отримала дотацию на консерваторскы працы. Дофінансуваня походит з буджету ґміны Рудна і з середків Фундациі KGHM Польска Мідь. Святыня в ґотицкым стилю была побудувана в XIV столітю і перебудувана по пожарі в XVII. В рамках прац будут завершены олтар та східня страна ризниці разом з надбудовом. Головном цілю задачы єст забезпечыти забыток та поправити технічный і естетичный стан будинку. Окрем інчого выбиют знищены місця получынь фраґментів конструкциі і цеглы, і дадут новы, што будут навязувати до ґотицкого стилю святыні. Новы цеглы сут ручні вырабляны в ремісничым закладі, сушены і выпаляны згідно з середвічныма взірцями. На закічыня робіт зрыхтувана буде гыдрофобізуюча імпреґнация, яка забезпечыт муры перед шкідливым діяньом воды. Цілковитый кошт задачы то 118 тис. злотых, в тым вклад власный парохіі (5 тис.), дотация з буджету ґміны (33 тис.) і середкы позысканы з Фундациі KGHM Польска Мідь (80 тис. злотых). Плянуваный термін закічныня консерваторскых прац то груден/децембер тр.

В ґміні Лабова будут глядати мінеральну воду

Ґміна Лабова хоче глядати на своій обшыри джерел лічничой і мінеральной воды. Пробны верчыня будут правдоподібно зроблены в будучым році в Камяній. Як повіл для радия РДН заступця війта Славомир Рыбарскій, терены ґміны Лабова сут барз планно ґеолоґічно досліджаны під взглядом мінеральной воды. Тестуваня вказало, што єдным з місц, в якых може ся находити мінеральна вода, єст як раз Камяна. Кєд результаты верчыня будут позитивны, буде то основом для одкрытя в тій місцевости курортной зоны. Ґміна плянує найменше три верчыня, што провірят, ци депозиты лічничой воды находят ся в Камяній, яку мают якіст і до чого можут быти схоснуваны. Самоуряд покля што глядат фінансуваня, кєд же кошты прац сут рахуваны на близко мілийон злотых.

Нова біциґльова інфраструктура в Креници

В Креници фурт розбудовуют спортову інфраструктуру. Пошырювана є і оферта для біциґлистів. Вшытко завдякы орґанізациі Европейскых Ігр Краків-Малопольща 2023, част якых одбуде ся в Креници. Од 21. червця/юнія до 2. серпня/авґуста будучого рока в Креници будут проходити змаганя в джудо і теквондо, гірскы бігы і змаганя на роверах МТБ. В звязку з тым на обшыри Крениці сут реализуваны інвестициі, якы ся вяжут з великом шансом на розвиток і промоцию ґміны. Змаганя в ізді на ровері МТБ будут проходити на полудньово-західнім боці Парковой Горы. Як подал бургомайстер Пьотр Рыба, Крениця отримала чергову промесу з Міністерства Фінансів на будову тору до паралельной ізды, якій буде частю трасы на змаганях МТБ в Европейсых Іграх. В рамках дофінансуваня побудуваны будут тіж два памп-тракы. Квота промесы то 1,5 млн злотых.