Сумар дня на 28. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 28. вересня/септембра 2022 р.

Ювілей Русиністичных Студий в Новым Саді

В пятницю, 30. вересня/септембра, в Новым Саді в Сербіі пройде наукова конференция з нагоды 40-літя фунґуваня Русиністичных Студий на Філософічным Выділі Університету в Новым Саді. Конференция поділена буде на штырі секциі: дві будут про лінґвістику, літературу і культуру та історию. Серед прошеных прелеґентів сут домашні дослідникы та науковці з інчых держав. Святочне одкрытя конференциі заплянували на 9.00 год., подія є отоверна для пулбикы, буде тіж трансмітувана через плятформу Zoom.

Выремонтуют дорогу Высова-Бліхнарка-Границя Державы, зроблят тымчасовый мост в селі Волівци

23. вересня/септембра Ґорлицкій Повіт достал з рук Секретаря Стану в Міністерстві Климату і Середовиска промесы на реализацию двох інвестиций вєдно з Державныма Лісами. В стрічы участ взяли м.ін. посланкыні Уршуля Новоґурска і Барбара Бартусь та самоурядовці ґорлицкого повіту. Перша з промес то веце як 2 млн зл на ремонт дорогы Высова-Бліхнарка-Границя Державы, друга – 300 тис. зл на будову тымчасового мосту в селі Воловец. Третя вручана того дня промеса, высокости 720 тис. зл, трафила в рукы Яна Музикы з заряду ясельского повіту і была то ґаранция грошів на ремонт мосту на дорозі Крампна-Жыдівскє-Граб. Полномічный Уряду дс. Лісництва і Полюваня Секретар Стану Едвард Сярка вчас стрічы з самоурядовцями ґорлицкого повіту бесідувал м.ін. про кошты надходячого сезону огріваня, додатку до джерел огріваня ци про заморожыня цін електричной енерґіі.

Санкова, Чырч і інчы

В рамках проєкту Спілпраца Держав Вышеградской Ґрупы пн. «Траснгранична спілпраца для партнерства і добробыту» фінансуваного з Медженародного Вышеградского Фонду, котрого ведучычм партнером было Стоваришыня Міст і Сел Словациі, прошла єдна зо штырьох конференций. Одбыла ся она 21. вересня/септембра в Мушыні, а орґанізувала єй Ґміна Санкова во спілпрацы зо Стоваришыньом Міст і Сел Словациі. Серед запрошеных гостів были представникы з Мадяр, Словациі, Чех та самоурядовці з ґорлицко-сандецкого реґіону, в тым представникы Ґміны Санкова. Війт Малґожата Малух розповіла про туристику як важну обшыр спілпрацы медже державами V4, про одпорніст туристикы в часах кризы на локальным рівни та про нарядя підпертя туристикы в містах і місточках. Представникы словацкых локальных власти зреферували м.ін., в якых проєктах бере участ Чырч. Село і околиця браны сут до увагы при будові новых біциґльовых стежок, ремонті доріг, ходників ци в проєктах звязаных з водном туристиком, таком як басены, кемпінґы, ци тіж – реліґійном туристиком.

Роботы при експресовій дорозі С19

Актуальні паралельні в парох місцях проходят роботы при будові експресовой дорогы С19 (S19) на обшыри підкарпатского воєвідства. В остатнім часі зосереджают ся на одтинках: Ряшів Полудне-Бабиця, Місце Пястове-Дукля та Дукля-Барвінок. Медже Місцьом Пястовым а Дукльом 10-кілометровый одтинок побудує фірма Страбаґ – Ґенеральна Дирекция Державных Доріг і Автострад підписала контракт на проєкт і роботу. Успішні закінчыл ся тіж конкурс на запроєктуваня і будову веце як 18-кілометрового одтинка експресовой дорогы медже Дукльом а Барвінком. То єден з тяжкых одтинків Via Carpathia з огляду на ґеолоґічну будову і середовисковы условія. Спосеред осмох оферт найліпшом вказала ся тота од спілкы POLAQUA, яка зреализує реченый одтинок за кус веце як 1,5 млд зл. Ґенеральна Дирекция Державных Доріг і Автострад плянує, што роботы скінчат максимальні до 42 місяців од даты підписаня догварінь.

Фот. за www.ruskeslovo.com