Сумар дня на 28. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 28. вересня/септембра 2021 р.

Колекта на ратуваня колекциі Дариі Боівкы

Стоваришыня Підпоры Локальных Ініциятив Команчы «Волк» просит о поміч, потрібує 70 тис. зл, жебы выкупити колекцию Дариі Боівкы і зорґанізувати Ізбу Памяток. Стоваришыня од понад 20 років підтримує розвиток ґміны Команча. Актуальна його ціль то затримати колекцию предметів, котру роками зберала разом з мужом жытелька ґміны Дария Боівка. Бесіда гев о ручні гафтуваным облечыню з ріжных сел в ґміні, пацюрковій біжутериі ци давным ґратю. Збірка рахує понад 50 елементів і окремо велику кількіст сучасных гафтів. Дария Боівка не лем колекцийонувала, але тіж одкрыла приватну Ізбу Памяток, завдякы чому вказувала свою збірку і припоминала о материяльній культурі Лемків. На жаль, по єй смерти неє охочых, жебы дальше вести Ізбу. Стоваришыня не хоче, жебы так цінна збірка пропала, зато цілю єст затримати цілу колекцию в ґміні. Зорґанізувано колекту грошів на сайті zrzutka.pl, на котру мож вплачати даткы. До єй кінця лишыло ся іщы лем 7 дни, а на тоту хвилю зобрано лем 11% вызначеной квоты. Стоваришыня «Волк» припоминат, же на вплачаючых ждут нагороды. Мотузок до колекты находит ся на офіцияльным фейсбуковым сайті Стоваришыня.

XV Ясельскій Літературный і Реґіональный Фестіваль 

Містецка Публична Бібліотека в Яслі просит любителів доброй книжкы на XV Ясельскій Літературный і Реґіональный Фестіваль. Подія, котрой головным мотивом є госло «Поезия і проза на дорогах і порожніх полях», проходит в днях од 27. вересня/септембра до 10. жолтня/октобра. На участників Фестівалю ждут три темовы стежкы: Дорогы і порожні поля, В ліричным Яслі та Дітячы страны. Гістми будут м.ін. Анджей Стасюк – польскій прозаік і есеіста, Катажына Шведа – поетка і фотоґрафка, авторка збіркы «Босорка» ци Мария Стшелецка – авторка книжкы для діти і молодежы пн. «Бескід без кіту». Орґанізаторы зрыхтували в рамках подіі і дальшы акциі. Пройде выстава фотоґрафій Пьотра Марецкого пн. «Придорожна Польща» та літературно-еколоґічны варштаты в Осередку Еколоґічной Едукациі в Ожынній, а тіж і прогулька по Низкым Бескіді з Мацєйом Маґнушевскым – природником і еколоґом. Чысло місц на поєдны подіі єст ограничене. Дармовы білеты входу доступны сут в Головній Чытельни Бібліотекы в Яслі, а цілый плян подіі найдете на нашым сайті.

Наймолодшы будут мочы познати історию Ігнатия Лукасєвича

Недавно інформували сме, же в марци будучого рока Нацийональный Польскій Банк выпустит выняткову, колекцийонерску монету з представліньом Ігнатия Лукасєвича з нагоды 200. річниці його народин. Не єст то єдиный спосіб, в якій Ґорлиці хотят упамятнити творцю світового нафтового промыслу. На другій рік вкаже ся ілюструвана байка, головым геройом котрой буде як раз Ігнатий Лукасєвич. На тоту ціль Місто Ґорлиці отримало 15 тис. зл з Фундациі ORLEN в рамках конкурсу «Моє місце на Земли». Публикация направлена єст на наймолодшых учеників основной школы і предшколяків. Книжка буде доступна в містецкых та шкільных бібліотеках. Цілю проєкту єст запознати наймолодшых жытелів міста з особом Лукасєвича.

фот. Gorlice24