Сумар дня на 28. мая 2024 р.

Приносиме вам сумар медияльной ґрупы ЛЕМ.фм+ на ден 28. мая 2024 р.

Польковиці розпочали проєкт помочы для опікунів осіб з неполносправностями

В Польковицях зачал ся проєкт «Перерваной опікы для жытелів ґміны Польковиці». Опіка реализувана буде в Опікунчо-Лічничым Закладі при Польковицкым Центрі Здравотных Услуг. То форма социяльной помочы для безпосередніх опікунів осіб з неполносправностями, котры будут мочы лишыти своіх підопічных на час заниманя ся штоденныма справами ци одпочынку. Поміч має часовый характер, а цілю проґраму єст підпора опікунів. З можливости опікы будут мочы скорыстати тоты опікунове і підопічны, котры сполняют три вымогы: опікун мусит занимати ся підопічным в місци замешканя, обоі прожывают в ґміні Польковиці та підопічный мусит сполняти вымогы окрислены в розпоряджыню. Як підкрислил ведучый Центра Здравотных Услуг, оферта скєруваня єст до осіб, котры выконуют барз тяжку роботу і часом уж бракує ім сил. В рамках доступных місц єден пациєнт буде міг скорыстати з двох циклів опікы в році, што разом дає 42 добы.

Спацер по Команчы та обзераня выняткового квітя

Стоваришыня «Серед приятелів» просит на природничу прогульку на луку в Команчы, котра єст єдиным місцьом в цілій Польщы, де росне Veronica gentianoides – вельорічна травяна рослина. То уж остатній момент, жебы видіти тото особливе квітя – закля квитне. Прогулькя пройде 1. червця/юнія в Ден Дітины. Окрем обзераня рослин мож буде послухати прелекциі про квітя і метеликы, але тіж выслухати істориі місц звязаных з Команчом, участникы будут звиджати православну церков і монастыр. Додатковом атракцийом для діти буде розвязуваня загадок. Прогулька зачне ся о 10.00 год., збірка участників під Урядом Ґміны Команча. Спацер закінчыт ся коло 14.00 год. огниском. Дрібниці находят ся на сайті Ґмінного Осередка Культуры Команча.

Не заберай звірят з ліса

Надлісництва апелюют, штобы не заберати дохыж дикых молодых звірят, цілю помочы. Як мож прочытати в апелю, мож тепер часто видіти молоду сарну, без дорослого особника в околици, єднак молоды не сут лишены. Зараз по народжыню молоды сарны ховают ся в высокій траві, а дорослы звірята находят ся поблиз. Лісничы просят, жебы абсолютно не дотыкати, ани не заберати молодых звірят з ліса. Підкрисляют, што більшіст такых проб помочы, хоцкі люде мают щыры заміры, кінчыт ся траґічні для звірят.

Вакацийны варштаты в ЕтноЦентрі, мож уж ся записувати

ЕтноЦентр Коросняньской Землі уж тепер просит на вакацийны варштаты. Того рока вынятково варштаты будут ведены лем в липци/юлию, а для участників зрыхтуваных єст пят турнусів присвяченых темі ремесла, природы, грам, забавам і оповіданям. В каждым тематичным блоку діти будут брати участ в забавах з аніматорами, кулінарных і плястичных варштатах. Участ в варштатах можут взяти діти в віку од 7 до 14 років. Формулар для записів та можливіст закупу білету находят ся на офіцийным сайті ЕЦКЗ. Чысло місц єст ограничене.

Фольклористичный Ярмак в Саноку

Музей Народного Будівництва в Саноку просит на 48. едицию Фольклористичного Ярмаку. Подія пройде 2. червця/юнія. На сцені запрезентує ся Ансамбль Пісні і Таньця «Leszczyniacy» і ґрупа «Гай» зо Словациі. Буде мож і обізрити презентацию музичного проєкту «Співаючо і з притупом». Будут показы ремесла, кєрмеш выробів ручной роботы і народной штукы та деґустациі реґіональных страв. Вступне дармо.