Сумар дня на 28. мая 2021 р.

Приносиме вам сумар медияльной ґрупы ЛЕМ.фм+ на ден 28. мая 2021 р.

Подля власти неє правных основ для хоснуваня урадовых таблиц по шлезскы

На Місным Уряді в Катовицях не буде таблиці по шлезскы. Діячы Молодой Уніі Шлезской Реґіональной Партиі і Молодых Шлезскых Реґіоналистів подали до Уряду Міста Катовиці петицию, в котрій жадали повісити коло таблиці з польскым написом «Уряд Міста» одповідника по шлезскы. Подібны таблиці мали бы ся явити і на інчых єдиницях самоуряду. Посол Мацєй Копєц попросил в інтерпеляциі до премєра вказати, ци істнує правна можливіст вывісити такы таблиці і хто о тым рішат. В одповіди на інтерпеляцию Блажей Побожый, віцеміністер внутрішніх справ і адміністрациі подал, што неє правных основ для хоснуваня урядовых таблиц в шлезскым етнолекті. Правным актом, якій реґулює м.ін. справы звязаны з захованьом і розвитком реґіонального языка, в тым можливіст хоснувати додатковы меншыновы назвы при урядовых назвах місцевости, фізийоґрафічных обєктів і улиц, єст устава о нацийональных і етнічных меншынах та реґіональным языку. Шлезакы не сут вызнаны польскым урядом як нацийональна або етнічна меншына. Закон вычыслят 9 нацийональных меншын, 4 етнічны і єден реґіональный язык. Серед них неє шлезского языка. В одповіди підкрислено, што закон вказує, в якых місцях можут быти хоснуваны додатковы назвы, і неє серед них ґмінных обєктів.

В Поляні одкрыли памятну таблицю посвячену Іванови Ольбрахтови

В віторок, 25. мая, Клуб Томаша Ґаріка Масарика в Ужгороді і Ужгородскє Общество Словаків зорґанізували в селі Поляна, мукачівского району, торжественне одкрытя на містній школі памятной таблиці посвяченой Іванови Ольбрахтови, чешскому писательови і публицисті. Велика част жытя Івана Ольбрахта была повязана з Підкарпатском Русю, де часто бывал в роках 1931-1936. Підкарпатска Русь стала про нього невычерпаным джерелом інспіраций. В своій творчости Ольбрахт черпал з жывота підкарпатскых Русинів, але і інчых народів, котры там прожывали.

Неодолга одкрыют Студентску Шатрову Базу в Реґєтові

Як поінформувала на своім фейсбуковым профіли Студентска Шатрова База в Реґєтові, в тым сезоні База выстартує уж в неділю, 13. червця/юнія, і буде одкрыта до 17. вересня/септембра. В тым році, інакше як влони, не обовязує уж резервация місц для ґруп меншых як 10 осіб, єднак базовый може одмовити приняти на нічліг особы, котры не змістят ся в вызначеным пандемічным ліміті. Інформуют і про нову зміну в реґуляміні, в звязку з яком в базі мож в єдным сезоні ночувати до семох ночы. Як поясняют, єст то спричынене фурт збільшаючым ся заінтересуваньом обєктом.

Мож ся іщы старати о цертифікат Місця Приязного Біциґлистам

Іщы до кінця мая тр. властителі услуговых обєктів, якы ведут діяльніст на обшыри малопольского воєвідства в одлеглости не більшій як 15 км од біциґльовых трас VeloMałopolska, можут ся старати о цертифікат Місця Приязного Біциґлистам. Такы системовы розвязаня сут хоснуваны в цілій Европі і сут помічны в орґанізациі, подорожы і одпочынку роверовых туристів. Актуально в Малопольщы цертифікат Місця Приязного Біциґлистам позыскало 97 обєктів, м.ін. в Креници і Мушыні.