Сумар дня на 28. мая 2020 р.

Приносиме вам сумар медияльной ґрупы ЛЕМ.фм+ на ден 28. мая 2020 р.

Буковскій продолжує свою роботу

Хоц од марця Словация має новый владный ґабінет, котрый веде премєр Ігор Матович, власти натепер не рішыли даяком зміном справу полномічного про нацийональны меншыны, і на тій посаді остає дале Ласло Буковскій, якій был номінуваный іщы в 2016 р. Полномічный надале выконує свою функцию. Буковскій в тыжни од 18. до 24. мая стрітил ся з двома міністерками. Початком тыжня бесідувал з міністерком справедливости Марийом Коликовом. Головном темом была дальша спілпраца тыкаюча поступу в рыхтуваню закону о нацийональных меншынах. Припомнийме, што теперішня влада зобовязала ся приняти споминаный закон. В пятницю, 22. мая, полномічный стрітил ся міністерком культуры Наталийом Мілановом. Обидві стороны мали вчас єднаня підкрислити важну ролю обидвох інституций при охороні і розвитку културы і достоменности нацийональных меншын на Словациі. Буковскій пояснил, што єст радый, же має за собом першы бесіды в маю. Поінформувал, же рыхтуваны сут дальшы конструктивны стрічы.

Волкы не дают спокою

В Бєщадах жытелі боят ся за себе і своіх близкых. Волкы підходят штораз ближе до ґаздівок. Влони на Підкарпатю волкы спричынили шкоды на близко 270 тис. зл. Загрызли 260 штук овец, 40 штук рогатой худобы і 60 інчых звірят. Пошкоджены маітелі складают до Реґіональной Дирекциі Охороны Середовиска в Ряшові штораз частійше внескы о признаня пошкоджыня. В 2019 р. найбільше страт спричыненых волками в підкарпатскым воєвідстві потведжено в ґміні Команча. Люде боят ся выходити зо своіх хыж, а тым більше выпущати діти. Волкы підходят до обыйстя, ідят коты, псы. Волкы освоіли ся ачий з містами, явили ся уж они в Саноку ци Ліску. Власти апелюют, жебы тримати безпеку і позорувати на тоты звірята. Заєдно люде скаржат ся, што проблемом єст збільшаюча ся популяция волків, котры сут під охороном. Подля жытелів реґіону повиннa быти проведена селекция, так жебы хоронити люди і іх ґазвідску звірину.

Театр Духновича і ПУНА вертают до роботы

Завдякы зниманю рестрикций в звязку з коронавірусом на Словациі свою роботу можут одновити і нашы русиньскы професийональны артистичны тілеса – Театр Александра Духновича і Піддукляньскій Умелецкій Народный Ансамбль. Обидвома інституциями заряджат Пряшівскій Самосправный Край. ПУНА плянує перед публиком выступити іщы в тым сезоні. Театр Духновича буде ся рыхтувал до премєры новой пєсы, котру заграт аж в новым сезоні. Полна діяльніст русиньского театру зачне ся 3. серпня/авґуста. Значыт, театральны вакациі будут того рока коротшы і театр буде рыхтувал новы інсценізациі, котры публика буде годна видіти правдоподібно на початку вересня/септембра. І так Театр Духновича продолжат рыхтуваня пєсы під назвом Детектор лжы в режысериі Светозара Спрушаньского. Од початку червця/юнія до робочого процесу буде рыхтувал ся і наш професийональный ансамбль – ПУНА. Робота так само буде выконувана при дотримуваню актуальных гіґієнічных заряджынь. В першій половині червця/юнія ансамбль плянує з хором і оркєстром записуваня новой платні. В другій половині місяця, іщы перед закінчыньом сезону, ПУНА хоче одограти дакілько представлінь. Початок нового сезону на тот момент запланувано на 1. серпня/авґуста.

Крампяньскій осередок одкрытый наново

Едукацийно-Музейный Осередок імени Яна Шафраньского в Крампній буде наново одкрытый. Зачынат він свою діяльніст в найблизшу суботу, 30. мая. Влони завершыли ремонт осередка. Товды заінсталювано в ним вельо мультімедияльного і інтерактивного едукацийного ґратя. На тот момент в осередку презентувана єст експозиция присвячена екосистемам выступучым на обшыри Маґурского Нацийонального Парку і його жытелям. Зо взгляду на дальше епідемічне загорожыня осередок буде функцйонувал в новым санітарным режімі. Одвиджати просторы осередка буде могло єдночасно максимально 15 осіб. Вылучены з хоснуваня будут дотыковы панелі, ґратя зо слухавками ци становиско з запахами. Одвиджаня головной експозицийной салі буде проходило без лектора. Осередок од вітірка до пятниці буде одкрытый в год. 7.00-15.00. Од суботы до неділі в год. 9.00-15.00. В понедількы буде закрытый.