Сумар дня на 28. марця 2025 р.

Приносиме вам сумар медияльной ґрупы ЛЕМ.фм+ на ден 28. марця 2025 р.

Шлезскій воєвода стрітил ся з преставниками меншыновых стоваришынь

В минулу середу 26. марця в Шлезскым Воєвідскым Уряді одбыла ся стріча з представниками стоваришынь нацийональных і етнічных меншын з обшыри шлезского воєвідства, ґаздом котрой был Шлезскій Воєвода Марек Вуйцік. В подіі брали участ і Віцевоєвода Михал Копаньскій, Полномічна Шлезского Воєводы до справ Нацийональных і Етнічных Меншын Маґдалена Шевчук-Штурц, Почестный Консуль Арменіі в Польскій Республиці – член Спільной Комісиі Нацийональных і Етнічных Меншын Грачя Бояджян. Серед прелеґентів нашли ся м.ін. представникы Міністерства Внутрішніх Справ і Адміністрациі і Воєвідской Поліциі в Катовицях. Підчас стрічы бесідувано о дотациях на діяня підтримуючы нацийональны і етнічны меншыны, о безпеці і протидіяню злочынам з ненависти та істориі і актуальной діяльности меншыновых середовиск.

Модернізация желізничного дворця в Креници іщы в тым році

Іщы в тым році мала бы рушыти модернізация желізничного дворця в Креници. Два тыжні тому по роках старань ґміна підписала нотярияльны акты і остала властительом креницкого дворця і штырьох желізничных ділянок в найблизшій околици. Стация была продана за близко 2 мілийоны злотых. Обєкт жде тепер ґенеральный ремонт. Подля заповіди власти курорту будинок може быти змодернізуваный уж в 2027 р. Вшытко залежыт од того, як скоро поведе ся отримати дофінансуваня. Як подал бургомайстер Крениці Пьотр Рыба, аплікуют о ревітализацию желізничного дворця з унійных середлків на рокы 2021-2027 з курортного компоненту. Внесок о дофінансуваня буде зложеный до кінця марця, мало бы то быти близко 9 мілийонів злотых. Три і піл мілийона піде на креницкій дворец з Польского Ладу. Власти рахуют, што кошт модернізациі вынесе близко 15 мілийонів злотых. Одновленый дворец має дальше полнити пасажерскы функциі, але не лем – мала бы ся там находити м.ін. висовискова саля ци поміщыня для самоурядовых і комерцийных ціли.

«Три ябка» в Рускій Бурсі в Ґорлицях

Уж заран, в суботу 29. марця просиме до Руской Бурсы в Ґорлицях на черговый показ спектаклю «Три ябка». Початок о 19.00 год. В минулым році Стоваришыня «Руска Бурса» в Ґорлицях в рамках свойой діяльности вырішыло збогатити лемківску драматурґію, і попросило о написаня пєсы Станіслава Білого, вызначного словацкого автора. Білый в своій пєсі одкрыват універсальны вопросы, але делікатно іх прифарблює лемківскыма реалиями. Пєса была писана на конкретны три акторкы: в ролях выступуют Івона Іскра-Криницка, Наталия Малецка-Новак і Моніка Тылявска. Станіслав Білый пєсу написал і вырежысерувал. Драматурґію робил Петро Медвідь, котрый текст переклал на русиньскій язык. Адаптацию тексту на лемківскій стандард зробил Петро Криницкій. Музику скомпонувал Матуш Павлик, і зо сценоґрафійом поміг Мирко Пелехач. Премєра одбыла ся в минулым місяци. Пєса «Три ябка» могла быти зреализувана завдякы підпорі Міністерства Внутрішніх Справ і Адміністрациі. Спектакль єст в лемківскым языку, для осіб выже 16 рока жытя. Красні просиме!