Сумар дня на 28. марця 2024 р.

Приносиме вам сумар медияльной ґрупы ЛЕМ.фм+ на ден 28. марця 2024 р.

ЛАПіТ «Кычера» заслуженый для Нижнього Шлеска

Лемківскій Ансамбль Пісні і Танця «Кычера» з Ліґниці был нагодорженый ордером «Заслуженый для Нижньошлезского Воєвідства». Переданя нагороды одбыло ся вчас ґалі зорґанізуваной в Ліґницкым Поли. В залученій до ордеру грамоті пише ся, што є она передавана для лемківского ансамблю за заслугы для воєвіства. Грамоту офіцияльно в імени ансамблю і членів одобрал його ведучый, Юрий Стариньскій. Стариньскій подякувал за признаня оцініня, а так само війтови ґміны Ліґницкє Поле, Рафалови Плезя. Вчас ґалі свій выступ дала як раз Кычера.

До Вышнього Комарника приходили вшыткы президенты

В суботу 23. марця 2024 р. на Словациі проходила перша тура президентскых выборів. В повязаню з тым словацка пресова аґентура TASR принесла статю, в котрій ся пише, же русиньскє село Вышній Комарник, што ся находит в окресі Свидник, одвиділи такой вшыткы президенты од закінчыня ІІ світовой войны. Припомнийме, што Вышній Комарник был освободженый 6. жолтня/октобра 1944 р. вчас тзв. Карпато-Дукляньской Операциі. Петро Голик, якій є істориком Воєннного Історичного Інституту в Братиславі, твердит, што як раз тото русиньскє село є єдным з нечысленных на Словациі, котре одвиділи праві вшыткы урядуючы президенты, наперед чехословацкы, пак словацкы. З чехословацкых президентів до Комарника найчастійше приходил ґенерал Людвік Свобода. До села, оддати чест під памятником, приходили і дальшы сучасны президенты, в тым урядуюча президентка Зузана Чапутова.

Буде окрема Рада для нацийональных меншын

В середу 27. марця в Містецкым Культурным Центрі в Ґаланті на Словациі одбыло ся выіздове засіданя влады Словацкой Республикы. Премєр Роберт Фіцо по засіданю оголосил створіня окремой Рады влады про нацийональны меншыны, котра має ся выділити як окремый порадный орґан з сучасной Рады влады СР про людскы права, нацийональны меншыны і родову рівніст. По правді, розвязаня пропонуване владом то поворот до того, што колиси было, а о чым бесідуют од років меншыны. Влада схвалила і пропозицию зміны статуту полномічного влады про нацийональны меншыны, на основі чого мают ся му розшырити компетенциі, наприклад в обшыри спілпрацы з центральныма орґанами штатной справы.Єднако полномічный по новому буде мал можливіст передкладати пропозициі на засіданя владного кабінету і посередництвом премєра.

З Польковиц до ліґницкого театру

Як інформує ґміна Польковиці, 26. квітня/апріля місценый Центр Культуры орґанізує выізд до ліґницкого Театру ім. Гелены Моджеєвской на пєсу «Фанну і Александер». Записы на выізд тырвают до 12. квітня/апріля. Вступне є платне, а деталі мож найти на сайті www.polkowice.eu. Выізд є спільный, в рамках орґанізациі подіі Центром Культуры. Треба підчеркнути, што ліґницкій театр од років має высоку реному в цілій Польщы, як добрый і заслуженый театр.