Сумар дня на 28. марця 2022 р.

Приносиме вам сумар медияльной ґрупы ЛЕМ.фм+ на ден 28. марця 2022 р.

Од днес в Польщы не обовязуют головны рестрикциі выкликаны пандемійом

Рішыньом Рады Міністрів од днес в Польщы не обовязуют головны ограничыня, якы были спричынены пандемійом коронавіруса. Окрем інчого не є уж обовязку закрывати ґамбу і ніс в публичным просторі. Знесіня ограничыня не тыкат лем працівників і пациєнтів медичных підметів. Додатково, од днес не є уж і обовязку домашньой ізоляциі і кварантанны для домашніх і осіб приізджаючых до Польщы. Хоц одкликаны были праві вшыткы рестрикциі, в державі цілый час утриманый єст стан епідеміі. Як заповіл міністер здоровля Адам Нєдзєльскій, можливе, же за даякій час замінят го на стан епідемічной загорозы. Значыт тото, же власти фурт будут іщы мочы привернути або ввести новы рестрикциі.

Выстава книжок і чаописів про діти і молодіж нацийональных меншын на Словациі

В Братиславі проходит выстава книжок і часописів про діти і молодіж нацийональных меншын, котры жыют на Словациі. Орґанізатором єст BIBIANA – Медженародный дім уменя про діти. Выставу пн. #слово#язык#книга мож обзерати од 24. марця до 24. квітня/апріля тр. в Ґалериі Душана Ролля в Братиславі. Выстава презентує і підпорює творчіст про діти і молодіж нацийональных меншын, котрой цілю єст припомянути, познавати, сохраняти і розвивати материньскы языкы як дідовизну предків, цінну част ідентичности. На выставі мож видіти м.ін. публикациі власных выдавництв нацийональных меншын, дальшы з книжковых фондів, будуваных меншынами з книжок привезеных з материньскых держав, або іх перекладів до словацкого языка.

Одкрыта нова атракция на креницкій Парковій Горі

Креницкы Загороды Сил Натуры ждут уж туристів. Нова атракция находит ся на полудньово-західній страні Парковой Горы. Місце має едукацийный характер, на обшыри понад 5 гектарів презентуваны сут права і явиска, якы рядят натуром. Одвиджаючы можут іх познавати завдякы специяльным інсталяциям позваляючым провести фізичны експерименты. До нового парку мож тіж прити на прогульку новыма алейками, одпочати на лавках і лежаках. Цікавым пунктом атракциі єст парк мініятур з бронзу, якы представляют найбарже характерны для Крениці обєкты. Працы при Загородах Сил Натуры вынесли разом понад 5 млн злотых.

Реконструкция Битвы під Ґорлицями одкликаня

В тым році зас не одбуде ся реконструкция Битвы під Ґорлицями. Подія проходиля в першый вікенд мая в Санковій десят років. Реконструкциі не было і послідні два рокы з причыны пандеміі. Тогорічны рыхтуваня до подіі перервала война на Украіні. Як подала Малґожата Малух, війт ґміны Санкова, реконструкция мала быти орґанізувана в рамках проєкту, на якій достали ґрант, але хотят пересунути тоты середкы на наступный рік. Будучы упамятніня битвы будут хотіти зорґанізувати ачий в інчій як мілітарна формі.

Новый адрес сиґналу лем.фм

Припоминаме, же з причыны зміны сервера радия лем.фм, од місяця высыламе з нового адресу, а старый о хвилю буде неактивный. Кєд слухате нас в VLC, Foobar2000 і інчых музичных плеєрах, конечны сут новы стежкы. Зміна не влият на інчы способы слуханя нашого радия.