Сумар дня на 28. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 28. лютого/фебруара 2025 р.

Лемківскы духовны одзначены медалями Комісиі Нацийональной Едукациі

Як інфомувала канцелярия Православного Архієпископа Вроцлавского і Щеціньского, 24. лютого/фебруара тр. в ґабінеті Нижньошлезского Куратора Освіты одбыло ся вручыня медалів Комісиі Нацийональной Едукациі наданых міністер Барбаром Новацком. Нижньошлезска Куратор Освіты Ева Скшынек вручыла одзначыня выріжненым духовным: о. митр. Любомирови Воргачови, деканови любіньского деканату, парохови православной парохіі в Ліґници, якій полнит функциі Візитатора Православной Реліґіі Любіньского Деканату і Методичного Дорадці дс. вчыня Православной Реліґіі, та о. протодіаконови Мєчыславови Олеснєвичови, секретарьови Канцеляриі Православного Архієпископа Ворцлавского і Щеціньского, полнячого функциі Візитатора Реліґіі Вроцлавского Деканату і Координатора дс. Вчыня Православной Реліґіі Вроцлавско-Щеціньской Єпархіі. Медаль Комісиі Нацийональной Едукациі єст надаваный за особливы заслугы для освіты і выхованя, особливо в обшыри дидактичной, выховавчой і опікуньчой діяльности, творчости для діти і молодежы та едукациі і розвитку учытелів.

Іван Завадяк одпрезентувал автобіоґрафічну книгу

В суботу 22. лютого/фебруара в Ужгородскій Публичній Бібліотеці русиньскій писатель Іван Завадяк одпрезентувал нову автобіоґрафічну книгу пн. «Налице тай нарубы». Інформувал о тым порталь підкарпатского русиньского журналя «Отцюзнина». Як пише порталь, «темом того выданя стали явны і тайны аспекты совітского періоду в жывоті як автора (котрому, подля його слів, і самому пришло быти шрубом в совітскій машыні), так і краю». Веце на тоту тему прочытате на нашым портали.

Чемпіонат Світа в сновборді на Креницкій Яворині

Уж в тот вікенд на Креницкій Яворині будут проходили змаганя в рамках Чемпіонату Світа в альпейскым сновборді. Тота спортова подія на світовым рівни одбыват ся в Креници уж другій раз. Што більше змаганя Чемпіонату Світа в сновборді мают быти орґанізуваны на Креницкій Яворині наступных пят років. Найблизшы змаганя одбудут ся в тот вікенд, 1. і 2. марця. В тым році орґанізаторы прирыхтували о вельо векшы трибуны як влони, з огляду на велику популярніст подіі. До Крениці приде на змаганя близко двостох спортовців з цілого світа. Чемпіонат Світа певністю влине на промоцию курорту, за справом телевізийных трансмісий о світовым засягу.

Окрыты школіня в Маґурскым Нацийональным Парку

Маґурскій Нацийональный Парк реализує проєкт «СаНАТУРиюм – міц природы». Його цілю єст м.ін. підношыня рівня еколоґічной свідомости і формуваня еколоґічных основ соспільства през підношыня кваліфікаций ріжных професийных ґруп в тій обшыри. В тым році в рамках проєкту зреализуваных буде 8 дармовых школінь направленых на особы, котры працуют з людми і природнича простір єст або може быти в тій працы хоснувана. Школіня будут ведены специялистами-практиками в Маґурскым Нацийональным Парку. Чысло місц єст ограничене і о участи рішыт порядок зголошынь. Школіня не творят циклю і мож взяти участ в єдній подіі. Інформациі о наборі на кажде школіня будут публикуваны окремо на інстернетовій стороні і фейсбуковым профіли парку.

Джерело фотоґрафіі: www.diecezjawroclawsko-szczecinska.pl