Приносиме вам сумар медияльной ґрупы ЛЕМ.фм+ на ден 28. липця/юлия 2021 р.
Меншыны в проґрамовых радах?
Посол Німецкой Меншыны Рышард Ґалля од долшого часу старат ся, жебы в проґрамовых радах тых осередків, котры надают проґрамы для меншыны, засідали представникы меншыны. Ґалля зложыл поправку до уставы о радийофоніі і телевізиі в тій справі. Проєкт зложыл в імени ґрупы парунадцетьох послів, а серед підписаных єст тіж бывшый міністер внутрішніх справ Томаш Сємоняк, котрый был тіж одповідальный за нацийональны і етнічны меншыны в Польщы. Неодолга буде рішыня, ци проєкт поправкы буде поданый до комісиі нацийональных меншын або до комісиі культуры.
Білеты на Ватру в Михалові. Скоро купуйте
Ближыт ся чергова Лемківска Ватра на Чужыні. Орґанізатор, Стоваришыня Лемків, заявлят, што чысло місц з огляду на пандемічны рестрикциі є ограничене і што білеты мож уж купувати в інтернетовій передпродажы згідні з принципом – хто першый, тот ліпшый. Доступный є тіж дрібницьовый проґрам подіі. Ціліст зачне ся в само полудне в суботу, 7. серпня/авґуста. По спортовій части зачнут ся концерты, якы переплітуваны будут інчыма акциями, як напр. зложыньом квітя під таблицями, якы упамятняют акцию «Вісла», ци переданьом Нагороды ім. Никыфора за 2021 рік. Кєд іде о музичну част, то на тогорічній листі выступуючых сут м.ін. ансамблі Ластівчата, Кычера, Древутня, Секция, Надія ци Гылля. Закінчыньом Ватры буде гулянка – забава при музиці ансамблю Вороны.
В Бортным вказуют, як ся облікати
Іщы неполны три тыжні мож в бывшій грекокатолицкій церкви в Бортным видіти выставу пн. «В неділю і наштоден». Експозиция презентує лемківскє жіноче облечыня. На експонаты складают ся фізичны елементы бабского облечыня, як напр. кабат, запаска, ґорсет, кошеля ци кривулька. Лахы вказаны сут в особливый спосіб, не традицийні на манекінах, але поміщены, розложены сут на специяльных стояках, што спричынят, же презентуют ся як жывы образы. Експозицию дополняют великоформатовы фотоґрафіі довоєнных Лемкынь авторства Романа Райнфуса пожычены Стоваришыньом «Руска Бурса» в Ґорлицях.
Конец з «Плайом»
Явил ся послідній, шістдесятый, номер періодика «Плай». То карпатскій краєзнавчый альманах печатаный од 1987 рока, якій посвяченый єст істориі, етноґрафіі, природі і культурі Карпат. Од 1990 рока «Плай» был пілрічником печатаным Карпатскым Товариством, якє рішыло закінчыти выдавати тоту публикацию. През 60 номерів періодика властиві не было такого, котрый не односил бы ся змістом до Низкого Бескіду, материяльной ци нематерияльной культуры Лемків. Не інакше є і тепер. В посліднім выданю часопису «Плай» нашол ся допис Войцєха Крукара пн. «Задовчыкова, Маковерты і Кісюча. Загадковы назвы в гнізді Яворника в Низкым Бескіді», а Тадеуш Трайдос пращат ся з «Плайом» обшырным омовліньом, на основі выдобытой з архіву XVIII-вічной візитациі, стану парохіі і церкви в Баници на Лемковині. Шырше про кінцьове выданя того карпатского альманаху найдете на сайті karpaccy.pl.