Сумар дня на 28. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 28. грудня/децембра 2021 р.

Потяг «Włóczykij» верарт на торы 

Од 6. січня/януара мож буде поіхати потягом з Ясла через Ґорлиці до Крениці. На найблизшых пару тыжнів вертат потяг «Włóczykij», котрый до того часу курсувал лем в вакацийным періоді. Уж літом самоурядовці і локальны діячы бесідували о одновліню получыня на час зимовых вакациі, так жебы любителі зимовых спортів могли скорыстати з атракций в Креници. Згідні з розкладом потяг в Креници буде перед 10.00 годином, а вертал буде коло годины 16.30. За вступныма інформациями, в курорті на подорожуючых буде ждал автобус, котрый ішол буде з желізницьовой стациі на лыжну стацию. Додатково, при вказаню білету на потяг, любителі лыжных спортів будут мочы скорыстати з 10-процентовой знижкы не лем на карнет, але тіж і ідло. Потяг буде курсувал в кажду суботу до 26. лютого/фебруара, вынятком єст ден одкрытя получыня, коли потяг поіхат в четвер 6. січня/януара і не буде ішол в суботу 8. січня/януара.

З Мушыны зас можна поіхати потягом під словацкы высокы Татры

То іщы не конец добрых новин, як іде о потягы. Вернуло получыня з Мушыны до Попраду. Медженародный потяг курсує в каждый вікенд од 25. грудня/децембра до кінця лютого/фебруара 2022 р. Потяг выізджат перед 10.00 год. з Мушыны і в доцільовым місци, в Попраді буде коло годины 11.30. По дорозі мож буде высісти м.ін. в Старій Любовни, де з нагоды повороту потягу місто зрыхтувало цікаву оферту для подорожуючых. З желізницьовой стациі ідут два автобусы, єден перевозит туристів до замку в Старій Любовни, другій іде в страну Червеного Кляштору. Зо взгляду на вынятковый стан на Словациі, звязаный з пандемійом, в подорож можут ся выбрати лем особы, яку приняли вакцину, з ковідовым цертифікатом. Додатково, скорше мусят выполнити специяльный документ, якій ся находит на страні korona.gov.sk, і го выдрукувати.

Конец обіздів на дорозі з Ґорлиц в страну Санковой 

Тымчасово одданый до хоснуваня єст міст в Санковій, якій є на воєвідскій дорозі но. 977. Протягом остатніх місяців обєкт был ремонтуваный. Як бесідує війт ґміны Санкова, Малґожата Малух, то добра новина не лем для жытелів ґміны ци повіту, але загальні для подорожуючых автами. Корыстаня з обіздів было некомфортове і выдолжало час подорожы. Новый міст єст модерный і ма вытримати наступных 50 років. До зробліня лишыло ся іщы пару річы, тзв. косметичны роботы, якы зо взгляду на погоду не можут быти тепер докінчены.

Велийна Стріча в Рускій Бурсі 

В найблизшу середу, 29. грудня/децембра, в Рускій Бурсі в Ґорлицях традицийно проходила буде Велийна Стріча, котра зачне ся о 17.00 год. Очывидно мож прити скорше, жебы разом варити велийны стравы і прикрашати яличку. На початку стрічы выступит дітячый ансамбль Терочка, што діє при Стоваришыню «Руска Бурса» в Ґорлицях. Пак при звуках коляд буде нагода побесідувати, попрібувати велийны стравы, поспівати та вымінити ся святочныма звыками з ріжных стран Лемковины. Стріча од років тішыт ся популярністю серед жытелів цілого ґорлицкого повіту і не лем. В імени орґанізаторів – сердечні просиме.

Крениця може ся похвалити чыстым повітрьом

В рамках акциі «Малопольща без смоґу» реализуваной Радийом Краків і Польскым Смоґовым Алярмом при спілпрацы з Малопольскым Воєвідством од 12. листопада/новембра до 20. грудня/децембра бадано якіст повітря в 6 малопольскых ґмінах. В остатнім етапі акциі досліджыня проведено в ґміні Крениця і Пивнична, де на 11 дни замонтувано нарядя, што мірят рівен пыліл в повітри. В тым часі добова норма была двараз збільшена в місцевости Пивнична і ани раз в Креници.