Сумар дня на 28. червця/юнія 2024 р.

Приносиме вам сумар медияльной ґрупы ЛЕМ.фм+ на ден 28. червця/юнія 2024 р.

«Лемківска Ватра» в Одреховій

Днес, 28. червця/юнія в лемківскым селі Одрехова пройде одкрытя подіі пн. Свято Лемківской Культуры «Лемківска Ватра». На 19.00 год. заплянувано торжественне запаліня Лемківской Ватры. Мают тому товаришыти лемківскы оповіданя переплітаны співом, музиком нажыво при акомпаніяменті ґітары, гушель і гармоніі. Заран, в суботу, участникы будут мочы запознати ся з лемківском кухньом в Карпатскій Корчмі в Заршыні. А в неділю 30. червця/юнія од 14.00 год. буде проходила головна част проґраму. В концерті выступлят: Хор Зоря з Устя Руского, Лем Мы з Команчы, Сусанна Яра і Бурян. Запрезентуваный буде собітковый обряд. В рамках подіі пройдут і многы варштаты: участникы будут годны навчыти ся робити кривулькы, плести вінкы, рыхтувати традицийны косметикы, будут і варштаты лемківской кухні та лемківской співанкы. Орґанізатором подіі єст Стоваришыня Локальна Ґрупа Діяня «Доріча Вислока». Припомнийме, што в рамках інчого проєкту, якій реализує тота орґанізация, в Одреховій – рідным селі Юрия Новосільского, возникне лемківска хыжа памяти о артисті. В лемківскій хыжы Новосільского мают м.ін. быти вказуваны працы, якы будут припоминати о лемківскым походжыню Новосільского.

XXVII «Світ під Кычером»

Зато на західніх землях Польщы, припоминаме, зачынат ся днес 27. едиция Медженародного Фольклорного Фестівалю «Світ під Кычером». Орґанізатором подіі є Лемківскій Ансамбль Пісні і Танця «Кычера». Фестіваль буде проходил од 28. червця/юнія до 7. липця/юлия. Выступлят ансамблі м.ін. з Іспаніі, Мексику, Болгариі, Індиі ци Сенеґалю. На фестівалю запрезентуют ся і русиньскы ансамблі з заграниці – Маковиця зо Свидника на Словациі і Ансамбль Дому Культуры в Рускым Керестурі з Сербіі. Фестіваль зачне ся концертом в Олесници, а пак загостит тіж до Лісця, Шпротавы, Польковиц, Ліґниці, Волова, Поляниці – Здрій, Рудной, Замениц і Ліґницкого Поля.

LXIII Фестіваль Русиньской Культуры «Червена Ружа» в Рускым Керестурі

В тот вікенд бавити ся на фестівали будут мати нагоду і Русины в Сербіі. Уж днес рушат 63. едиция Фестівалю Русиньской Культуры «Червена Ружа» в Рускым Керестурі. На днешній вечер заплянуваный єст конкурс на найкрасшый голос і змаганя на найліпшу нову композицию в забавным духу. Зас в суботу пройде «Червене пупча» – фестівальовый проґрам для діти, а вечером ґаля-концерт – «Одгукы рівнины». Орґанізатором фестівалю єст Дом Культуры Рускій Керестур.

Модернізация водопроводной сіти в Малопольщы

Ґміна Санкова нашла ся серед єденадцетьох самоурядів в Малопольщы, котры достали дофінансуваня на модернізацию водопроводной сіти. До малопольскых самоурядів трафіло в сумі понад 30 млн злотых – роботы будут тыкати предовшыткым выміны старых елементів сіти та інсталяциі інтеліґентных системів заряджаня і моніторуваня. Уможливит то ограничыня страт воды і звекшыт ефективніст єй достав. В Санковій працы будут обнимати м.ін. модернізацию систему побору воды, єй очыщаня і звекшыня можливости маґазинуваня воды. Зрыхтуваный ґміном проєкт передвидує і монтаж сонды, котра уможливит моніторуваня якости воды і водозалежных хворіт. На реализацию задачы ґміна має два рокы.