Сумар дня на 27. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 27. вересня/септембра 2022 р.

Нова церков в Ґладышові наберат формы

Будуча святыня в Ґладышові то не єст уж лем проєкт на папері, на ділянці сут уж фундаменты, стіны і місця, де будут вікна і двері. Будова має дост нетиповый характер, вшытко єст перше складане выконавцьом в його працовни в Яслі, а пак розберане і в частях перевожене на пляц будовы в Ґладышові і зас складане. Тепер поставлену конструкцию треба буде забезпечыти. Оптимістичный плян закладат, же іщы того рока поведе ся закрыти копулом част олтаря. Вшытко єднак залежыт од погоды і выконавці. На зиму працы в Ґладышові будут завершены, в тым часі будовляна екіпа займе ся рыхтуваньом конструкциі даху. Нова деревяна церков в Ґладышові будувана єст на взір неістнуючой уж церкви свв. Космы і Даміяна в Незнайовій. Ґладышівска парохія вєдно з будовляным комітетом звертают ся з просьбом о дальшу підпору будовы той лемківской церкви.

Петро Трохановскій о Акциі «Вісла»

Округовый Музей в Новым Санчы просит в четвер 29. вересня/септембра на стрічу з лемківскым діячом, поетом, писательом і реґіоналистом, котрый прожыват в Креници, Петром Трохановскым. Стріча, яка посвячена буде выселіням проведеным в 1947 р. в рамках Акциі «Вісла», пройде в Головным Будинку Музею і зачне ся о 17.00 год. Вступ платный символичну злотівку.

Жолтен з «Карпатскым слуховиском»

Фонд Реґіональный Інститут просит на дальшы части «Карпатского слуховиска». На жолтен/октобер зрыхтуваны сут штырі стрічы, кажда посвячена буде інчій темі звязаній з жытьом Лемків і Бойків. Перше мож было послухати о кухни і традициях, тепер час на леґенды, рослины хоснуваны в штоденным жытю, тоты, што роснут в загороді, буде і о музиці і інструментах. Найблизша стріча пройде 6. жолтня/октобра під гослом «Віріня і леґенды». Зачне ся о 17.00 год. і вюл єй буде Анджей Потоцкій. Мотузок до слуховиск і більше інформаций находит ся на фейсбуковым сайті Карпатского Народного Університету.

Літо ся скінчыло, час на редик

1 жолтня/октобра одбуде ся подія «На пастырскым пути – Редик в Ославици». Стріча пройде в колибі у Франоса в Ославици. Зачне ся о год. 13.30 од того, же трембіты кликати будут уці, але уж скорше, о 11.00 год. мож буде взяти участ в зілярскій прогульці. В проґрамі подіі находит ся деґустация сырів, показ пастырскых інструментів, ткацтва, ярмак реґіональных продуктів і лемківскы забавы для діти. Заграт капеля Угерец, фольковый ансамбль Інуля, ансамбль трембіт і народной музикы Карпатія і ґрупа Сеньор.

XXIX Любовняньскій Ярмак

Власти міста Стара Любовня просят на XXIX Любовняньскій Ярмак. Подія зачне ся в четвер, 29. вересня/септембра, але офіцийный початок ярмаку пройде ден пізнійше, в пятницю. В проґрамі подіі окрем стандардовых ярмаковых атракций находят ся выступы дітячых ансамблів, бесіды, прелекциі, выставы і забавы. На сцені запрезенує ся м.ін. ансамбль ГРДЗА. Цілый проґрам подіі находит ся на фейсбуковым сайті міста Стара Любовня.