Сумар дня на 27. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 27. вересня/септембра 2021 р.

4. едиция конкурсу пн. «Книжка рока Пряшівского Самосправного Краю 2020» – серед нагородженых публикациі русиньскых авторів і книжка про Русинів

Конкурс пн. «Книжка рока Пряшівского Самосправного Краю 2020» орґанізуваный єст ПСК і Нацийональном Бібліотеком ім. Павла Орсаґа Гвієздослава. Цілю подіі єст сперати та пропаґувати реґіональну літературу. Змаганя проходят в двох катеґориях. Перша тыкат красной літературы та публикаций для діти і молодежы. До другой катеґориі зголошувано фахову літературу, в тым м.ін. енциклопедиі ци духовны книжкы. Спосеред многых зголошынь, доцінено книжкы русиньскых авторів. Нагороджено Яна Калиняка за його твір «Русиньскы народны співанкы» та Івана Чіжмаря за книжку «Народный крій Русинів на фотоґрафіі». Русиньску літературу доцінено тіж в інтернетовым голосуваню, котре выграла Людмила Шандальова і єй публикация про діти пн. «Напю ся водичкы». Почестне місце заняла тіж публикация авторства Петра Мішака і Петра Вырлика пн. «Повісти і оповіданя карпатскых Русинів».

Нацийональне Повселюдне Списуваня 2021

Припоминаме, же іщы лем до кінця вересня/септембра 2021 рока потырват в Польщы Нацийональне Повселюдне Списуваня, а як вказуют статистикы дальше не списало ся 10% жытелів Польщы. Обовязок списати ся має каждый, хто постійні або часово прожыват на обшыри Польщы. Од початку квітня/апріля тр. списуваня проходит головно в інтернетовій формі, але мож ся тіж списати при помочы рахмайстрів. Што важне, за не списаня ся горозит грошова кара, аж і до 5. тис. зл. Вшыткы переданы в списі даны сут обняты статистичном таємницьом і сут анонімовы. Дакотры з чысел зобраных вчас тогорічного списуваня сут особливо важны для лемківской меншыны. Мож в ним м.ін. окрислити свою нацийональніст і хоснуваный язык, в тым окрему лемківску нацийональніст і лемківскій язык.

 Малопольскы самоуряды достали середкы на направы по літніх зливах

Грошы трафлат до ґмін в новосандецкым і ґорлицкым повітах, в тым до ґміны Устя Рускє і Санкова. Червцьовы і липцьовы дощы лишыли по собі вельо страт, зорваны мосты, пошкоджены дорогы ци знищену інфраструктуру. На внесок малопольского воєводы, Лукаша Кміты, премєр Матеуш Моравєцкій перезначыл з цільовой резервы державы понад 48 млн зл. для малопольскых самоурядів на ремонт, перебудову ци одбудову інфраструктуры знищеной в часі зливы. Ґміна Устя Рускє отримала понад 2,5 млн зл. Тото дофінансуваня буде перезначене на ремонт доріг в Ґладышові, Высові і Устю Рускым. 600 тис. зл, котре достала Ґміна Санкова, дозволит выремонтувати три дорогы в Рыхвалді, Мацині Малій і Ропици Рускій.

Маґурскій Нацийональный Парк зрыхтувал для одвиджаючых новы атракциі

Од недавна вандруючы по Маґурскым Парку можут смотріти інтерпретацийны панелі. Закля што находят они ся в двох місцевостях – Свіржовій Великій і Незнайовій. На панелях находят ся персоны, обєкты або краєвиды історичні звязаны з реґіоном. Такє розвязаня дозвалят обзераючым оповісти, што находит ся на панели. Думку зреализувано в рамках проєкту «Ровером через Погранича – природа, культура і істория на двох колесах».