Сумар дня на 27. січня/януара 2021 р.

Приносиме вам сумар медияльной ґрупы ЛЕМ.фм+ на ден 27. січня/януара 2021 р.

Стріча президентской пары з представниками ріжных реліґійных конфесий

В четвер, 21. січня/януара 2021 р., одбыла ся традицийна стріча польской президентской пары з представниками ріжных реліґійных конфесий і репрезентантами нацийональных і етнічных меншын. Конференция з причыны пандемічных ограничынь проходила онляйн. Дуда вєдно з Першом Дамом передали вшыткым присутным на відеоконференциі новорічны желаня і слова підпоры на тяжкій панедмічный час. В новорічній стрічы взяли участ костельны і церковны єрархы, были і дальшы представникы конфесий зъєднаных в Польскій Екуменічній Раді, владыкы Ординарияту Польского Войска (в тым православны і євангелицкы), представникы жыдівской і мусульманьской спільнот, та другы запрошены гості. Президентска пара запросила так само представників нацийональных і етнічных меншын. Присутны были особы, якы засідают в Спільній Комісиі Уряду та Нацийональных і Етнічных Меншын.

Поміч тіж для ґмін з Лемковины

Урядовый проґрам помочы туристичным ґмінам в одповіди на страты спричынены пандемійом має рушыти в першій чвертці тр. Буджет того проґраму выносит мілиярд зл. З обшыри ґорлицкого повіту на підпору можут рахувати ґміны Устя Рускє, Санкова, Ропа, Липинкы, Лужна, місто і ґміна Ґорлиці. Высокіст фінансовой помочы вынесе 40% вартости выдатків на інвестициі, якы дана ґміна понесла в роках 2016-2018. Грошы буде мож презначыти на фінансуваня або дофінансуваня загальнодоступной туристичной інфраструктуры, а тіж комунальной інфраструктуры звязаной з туристичныма услугами. По перерахуваню, напр. ґміна Санкова має шансу отримати близко 4 млн зл дофінансуваня. Пріоритетом буде побудувати сіт водопроводу в Мацині і каналізацию всядиль там, де єй неє. Ґміна Устя Рускє за дофінансуваня буде хотіла выремонтувати басен в Высовій та дорогу з Ґладышова до Кривой. Обі єдиниці можут старати ся іщы о грошы з проґраму підпоры для ґмін, в котрых фунґували зліквудуваны уж державны підприємства рільничой господаркы, тзв. ПҐР-ы.

Не буде миропомазаня для троіх учеників?

В понедільок, 25. січня/януара, медиі в Польщы пошырювали інформацию, цитуючы за портальом Gorlice24.pl, што ученикы католицкой парохіі в Ропици Польскій, котры хотят приступити до тайны миропомазаня, мусят підписати освідчыня отримане од священника ропицкой парохіі – о. Станіслава Маковєцкого. В писмі мусят задеклярувати, што не підтримуют Страйку Жен і што усунут зо своіх профілів на сайті Facebook зміст звязаный зо страйком. Знатя, што ситуация тыкат трьох кандидатів до миропомазаня. Єпархіяльный Уряд в Ряшові однюс ся до справы в офіцийным выступліню. В комунікаті мож прочытати, што парох в тот спосіб мал помочы молодым особам підняти рішыня приступити до тайны миропомазаня, «не лем в свобідный, але барже свідомый спосіб». Уряд підтримал діяня священника, подаючы в першым пункті комунікату, што до тайны миропомазаня в Католицкым Костелі «можут і повинны приступити лем тоты особы, котры акцептуют правды віры і принципы моральности згідны з його науком».

Ліпшы статистикы, хоц тяжшый рік

Леа Геілова з Одділіня Комунікациі і Пропаґациі Пряшівского Самосправного Краю поінформувала про статистикы одвидин музеів і ґалерий за минулый рік. Хоц діяльніст вшыткых інституций з причыны пандеміі позначена была рестрикциями, то векшіст однотувала рекордовы чысла туристів, головні в літнім сезоні. Разом в 2020 році культурны інституциі ПСК одвиділо більше як 357 тис. осіб, што порівнуючы до 2019 рока є веце о 188 тис. осіб. Рекордовы статистикы одвидин зарахувал м.ін. Любовняньскій Музей – Замок в Старій Любовни, Музей Енді Варголя в Меджелабірцях ци Выгорлятскій Музей.