Сумар дня на 27. січня/януара 2020 р.

Приносиме вам сумар медияльной ґрупы ЛЕМ.фм+ на ден 27. січня/януара 2020 р.

Розвиток Чырча

Село Чырч в старолюбовняньскым окресі находит ся серед найбільш успішных і найвеце розвиваючых ся русиньскых сел на Словациі. Чысло жытелів в Чырчы, котрым треба новых місц прожываня, росне каждого рока. Староста Михал Дідік поінформувал пресову аґентуру ТАСР, же зато рыхтуют нову локалізацию, де постепенно выникнут 54 фундушы на будуваня. А староста має і дальшы пляны. Інвестицию в сумі 700 тисячів евро буде село фінансувало зо своіх джерел. Част страт мала бы ся вернути самосправі в формі доходів за проданя фундушів. Проєкт має веце етапів. Першый мал бы ся зачати ярю того рока і завдякы ньому выникне 18 фундушів. Нова локалізация в екстравіляні села буде на обшыри 110 тисячів квадратных метрів. Буде там побудувана комлетна інфраструктура і пляц забав для діти. За збільшаючым ся трендом чысла населія в Чырчы є подля старосты і м.ін. творіня новых робочых місц в селі ци підпора спорту і культуры.

«Вояком Швейком» частійше і долше

Медженародный потяг «Вояк Швейк», якій ходит на пути з Ряшова до Меджелабірців, буде того літа курсувал тіж в кажду пятницю, інформує о тым словацкій денник Korzár. Того рока, згідно з принятым договором польской і словацкой стран, потяг буде ходил о єден ден більше як влони. В порівнаню до посліднього сезону, коли потяг ходил в липци/юлию і серпни/авґусті лем в суботы і неділі, тепер словацка і польска желізниці пустят получыня тіж в пятниці. Як повіл про денник представник польской желізниці, Полякы сут задоволены з веденой спілпрацы. Додал, што польска страна єст заінтересувана пущыньом в будучым році потягів, якы дадут можніст подорожы до Кошыц ци Гуменного. Польска желізниця робит тіж над ріжныма бенефітами про подорожуючых, котры уж по части ся провірили. Тогорічный «Вояк Швейк» зачне ходити в остатнім тыжни червця/юнія. Дата не припадкова, бо товды буде проходил шторічный Фестіваль Культуры і Спорту в Меджелабірцях (29.-30. червця/юнія). Пут, котром іде потяг з Польщы на Словацию, веде через лупківскій тунель, а тым самым через русиньскы села на Лемковині і Пряшівскій Руси. Потяг буде ходил до першого вікенду вересня/септембра.

Выстава Стефана Переґрима

Мож іщы обзерати в БАВ (Бюрі Артистичных Выстав) в Зеленій Горі выставу малярства родженого в Поворознику Стефана Переґрима. Творчіст артисты легко мож заклясифікувати як творчіст непрофесийну або наівну. Сам ниґда формально не вчыл ся малювати. Артиста вполни свідомі односит ся до свого ґеоґрафічного та ідеового середовиска. Оповідат своє теперішнє місто, односячы ся єднак до пейзажу дітинства. Односит ся до минулого, видячы в ним надію для будучности. Лучыт правдиве з нереальным. Проста, а єдночасно точна форма образів Стефана Переґрима выникат з його фасцинациі метафізиком. Выстава «Зробити видным невидиме» потырват іщы до 2. лютого/фебруара того рока.

Знаме уж терміны трьох найбільшых русиньскых імпрез

Хоц до яри іщы кус, а до літа іщы дале – хочеме уж тепер поінформувати о датах трьох найбільшых русиньскых подій, котры пройдут того рока. Кажда з них принесе нам вельо атракций і вартат тот приємный час уж тепер сой заплянувати. Русиньскій Фестіваль во Свиднику єст найбільшым русиньскым фестівальом во світі. Тогорічна, VIII едиция одбуде ся в днях од 25. до 31. мая. Через цілый тыжден проходити будут чысленны культурны і освітовы акциі, скорше были то м.ін. авторскы стрічы, літературны вечеры, русиньскы театральны пєсы ци выставы. Другом з великых русиньскых подій, котра так само одбыват ся на Пряшівскій Руси, є Русиньска Ватра в Малым Липнику над Попрадом. ХІ едиция подіі проходила буде через вікенд од 10. до 12. липця/юлия. XL (40) Лемківска Ватра на Чужыні одбуде ся традицийно в першый вікенд серпня/авґуста, значыт 7. і 8. Єст то найбільша лемківска пленерова подія в Польщы, котра окрем фестівальового характеру все старат ся підтримувати патріотичного духа серед Лемків. На сцені ювілейной Ватры в Михалові запрезентуют ся ансамблі граючы ріжны жанры.

Фот. bwazg.pl