Сумар дня на 27. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 27. серпня/авґуста 2020 р.

В Тжцянці памятают на своі коріня

В найблизшу суботу, 29. серпня/авґуста, о 17.00 год. одбуде ся в Тжцянці в великопольскым воєвідстві подія під назвом «Літо з фольклором – Там на Лемковині…». Як бесідує Анна Шыманек з Музею Наднотецкой Землі, вчас подіі будут выступувати штырі ансамблі. Запрезентуют ся ґрупы Кычерка, Лемко Тавер, Коханый Спів і Троянда. Подію спілорґанізує грекокатолицка парохія з Валча і містецкій уряд в Тжцянці. Більше інформаций глядайте на нашым інформацийным портали.

Грекокатоликы упамятнят 95. річницю обявлінь на Святій Горі Явір

Вірны грекокатолицкой Церкви будут іти в поломничестві на Святу Гору Явір. Тым разом єст оно орґанізуване з нагоды 95. річниці першых обявлінь на Святій Горі. Поломникы выйдут в суботу, 5. вересня/септембра, з русиньского села Курів, де в грекокатолицкій церкви буде правлене богослужыня. Пак будут путувати через Ґабольтів, Цигельку, жебы пак дійти на Святу Гору Явір на Лемковині. О 18.00 год. буде в місцевій каплици правлене богослужыня. Орґанізаторы поломничества просят зголошувати свою участ до 2. вересня/септембра. Вчас путуваня передвиджено полуденок. По молитвах на Горі, буде можніст вернути автомобільом до Курова, на Пряшівщыні. 8. вересня/септембра 1925 р. трьом Лемкыням обявила ся Пресвята Богородиця, коли вертати зо словацкого Ґабольтова, де был посвячаный тамтышній римокатолицкій костел.

Місце памяти про ґорлицкых Жыдів

Місто Ґорлиці хоче упамятнити історию місцевых Жыдів. До ІІ світовой войны близко половина його жытелів то были Жыды. В Ґорлицях было пару синаґоґ і місц сильно повязаных з жыдівском культуром. Жебы припомнути своіх бывшых жытелів, місто выстарало ся о 105 тис. зл в Міністерстві Заграничных Справ. Цілковитый кошт вшыткых заплянуваных робіт і подій то 360 тис. зл. В рамках того одбуде ся реновация мацев, котры были скорше найдены вчас реновациі ул. Стражацкой – найдут они місце в специяльні побудуваным памятнику. Має быти зрыхтуваный і специяльный мураль та одбывати ся мают і інчы акциі, такы як пленерове кіно, выклады онляйн, варштаты ци выставы. Партнером проєкту, з котрым вышло місто Ґорлиці, єст United Gorlice Society з Ню Йорка.

Закрыты границиі на Украіну

Украіна вводит часовый заказ въізду до державы для чужынців в звязку з пандемійом коронавіруса. Чысло хворых скоро ся збільшат, зато украіньскы власти рішыли вчера закрыти вшыткы границі, так жебы чужынці не могли іх переходити. Заказ має зачати обовязувати од 29. серпня/авґуста до 28. вересня/септембра. Обняти ним будут тіж границі на Підкарпатскій Руси. В послідніх днях на Украіні каждого дня інформувано о більше як 1600 зараженых коронавірусом. Украіньскє Міністерство Заграничных Справ подає, што заказ не буде тыкал м.ін. осіб, котры мают позволіня на прожывяня в державі ци сут членами медженародных або гуманітарных акций, діячы культуры, котры мают запрошыня од інституций культуры, але тіж вельох інчых осіб. Што цікаве, украіньскы власти не заперают своіх границ на громадян Білоруси, котрым хочут запевнити безпеку, кєд тоты мусят еміґрувати з рідной державы в тых нелегкых для Білорусинів хвилях.