Сумар дня на 27. мая 2024 р.

Приносиме вам сумар медияльной ґрупы ЛЕМ.фм+ на ден 27. мая 2024 р.

Русиньскє Нацийональне Свято на Мадярях

В суботу 25. мая в мадярскым Дебрецині одбылa ся подія під назвом Русиньскє Нацийональне Свято, котру каждого рока орґанізує в інчым місци Вседержавне русиньскє самосправуваня. Подію одкрыл предсідатель орґанізациі Віктор Крамаренко. Участных поздоровил і Ласло Повшан, предсідатель Культурной комісиі Парляменту Мадяр. Серед гости были і Віра Ґіріц, посланкыня мадярского парляменту за Русинів, Микола Бобинець, член Світовой рады Русинів за Украіну, за Словацию Петро Медвідь, і дальшы. По святочных приговорах і музичных выступлінях, одбыло ся торжественне переданя Преміі ім. Антония Годинкы. Тот рік лавреатом преміі остал грекокатолицкій священник, отец Михаіл Тіводор, котрый походит з Мукачівской єпархіі, а од 2016 рока служыт Русинам в столици Мадяр, Будапешті. Більше про тогорічного лавреата прочытате на нашым портали. Торжество продолжало ся молитвом параклису, котрый одслужыл Высокопреосвященый владыка Филип Кочіш, архієпископ і митрополита гайдудорожскій. Покровителями тогорічного русиньского свята были Мікловш Шолтес – державный секретар з вопросів реліґійных і нацийоналных капчань, Ласло Повшан – предсідатель Культурной комісиі Парляменту Мадяр, і Віра Ґіріц – посланкыня мадярского парляменту за Русинів.

Секретар МВСіА стрітил ся з нижньошлезскым воєводом і представниками меншыновых орґанізаций

В четвер 23. мая секретар стану в Міністерстві Внутрішніх Справ і Адміністрациі Томаш Шыманьскій і Нижньошлезскій Воєвода Мацєй Авіжень стрітили ся в Нижньошлезскым Воєвідскым Уряді з представниками стоваришынь і звязків репрезентуючых нацийональны і етнічны меншыны. То перша робоча стріча, але подля віцеміністра Шыманьского, будут ся они одбывати реґулярно, при участи векшого чысла орґанізаций. Участны представили діяльніст своіх орґанізаций і проблемы, з котрыма мусят ся міряти. Бесідували о вчыню языків, шыріню культуры, представляню своіх традиций і звыків. В стрічы вляли участ м.ін. Євген Габура – заступця предсідателя Головного Заряду Стоваришыня Лемків, і Богдан Копча – член заряду СЛ. Ден пізнійше, в пятницю 24. мая міністер МВСіА Томаш Сємоняк брал участ в нараді з воєводами, на котрій присутный был і секретар стану в МВСіА Томаш Шыманскій. Віцеміністер Шыманскій заповіл свою візиту в дальшых воєвідствах по тым, як одвиділ нижньошлезскє і шлезскє воєвідства, цілю познати специфікы іх фунґуваня. Як подал, іде і о обшыр нацийональных і етнічных меншын та реліґійных звязків.

Дальшы здіґіталізуваны номеры «Карпатской Руси»

Як інформує америцкій Лемко-Союз (Lemko Association), єдна з нашых найстрашых еміґрацийных, реактивуваных орґанізаций, в посліднім часі до діґітальной базы ґазеты «Карпатска Русь» долучыли дальшы номеры. То аж 96 примірників Карпатской Руси, якы дотля не были здіґітализуваны. Обнимают они рокы 1971-2002. Перед доданьом дальшых 96 номерів в базі «Карпатской Руси» находили ся уж 2233 примірникы. Дрібниці і мотузок до діґітальной базы найдете в дописі на нашым портали.

Утрудніня в руху в Польковицях

Ґміна Польковиці інформує о утруднінях в руху. В звязку з ремонтом закритый для автомобільного руху буде желізничный перехід на повітовій дорозі 1169D в сторону місцевости Тшебч і Ґузіце. Утрудніня мают потрырвати од 3. до 15. червця/юнія. Направа переходу єст конечна і выкликана дальшым етапом ленійовых робіт в рамках реализуваной задачы модернізациі желізничных леній 971 і 971а медже Любіном і Польковицями.