Сумар дня на 27. мая 2020 р.

Приносиме вам сумар медияльной ґрупы ЛЕМ.фм+ на ден 27. мая 2020 р.

Зрегабілітували Грекокатолицку Церков на Словациі

Ведучый Нацийональной Рады Словацкой Республикы Борис Коллар офіцийні перепросил Грекокатолицку Церков на Словациі за протизаконне і недемократичне потрактуваня в 1950 році, коли то комуністичны власти рішыли зліквідувати Грекокатолицку Церков в бывшій Чехословациі. Оправданя прошло при нагоді 70. річниці заказу Грекокатолицкой Церкви так званым Пряшівскым Собором в рамках святочного одкрытя пропамятной таблиці грекокатолицкому єпископови Павлови Петрови Ґойдичови. Таблицю помістили на стіні будинку вязниці в Леопольдові, де перетримувано грекокатолицкє духовенство, в тым блаженного Ґойдича. Одкрытя таблиці прошло в понедільок, 25. мая. Присутный был м.ін. найвысшый представитель Грекокатолицкой Церкви на Словациі пряшівскій архієпископ і митрополита Йоан Бабяк. Председа парляменту перепросил і вшыткых люди, котрым подля слів Коллара «державны власти одняли права, вкрали маєток, позбавили достойности і взяли тото, што найцінійше – жытя».

В Ґорлицях будуют нову некрополию

Уряд міста Ґорлиці поінформувал, што зачали ся роботы звязаны з рыхтуваньом терену під будову цмонтеря при улици Дукляньскій при выізді з міста. Зо взгляду на тяжку ситуацию спричынену епідемійом COVID-19, жебы утримати місця роботы, місто Ґорлиці зарядило Містецкому Закладови Комунальных Услуг зробити мікронівеляцию реченой обшыри. Працы обнимают: поміры, стягніня верствы гумусу та земны роботы копарками, значыт формуваня і загущаня насыпів. Роботы плянуют скінчыти до 30. листопада/новембра. Будова нового цмонтеря звязана є з браком місця до хованя на парохіяльным і комунальным цмонтери, якій містит ся при улици Краківскій. Для части жытелів Ґорлиц локалізация нового цмонтеря єст не до принятя, што поясняют фактом, же находит ся за далеко од центру і трудно буде до него дотерти. Уклад нового цмонтеря достосуваный є до топоґрафіі терену, його центральным місцьом буде пляц утвореный през похоронный дом і каплицю, обрамуваный колонадом.

Уряд в Польковицях зас отвореный для інтересантів

Од понеділька, 25. мая, інтересанты зас можут занимати ся своіма справами в польковицкым уряді ґміны, очывидно в санітарным режімі. Бургомайстер Польковиц Лукаш Пузнєцкій підкрислил, што робітникы уряду будут принимати інтересантів при своіх становисках при захованю середків ограничаючых пошырюваня нового типу коронавіруса. Урядник і особа, котра приходит зо спарвом, мусят мати закрыту ґамбу і ніс, а при єдным становиску може быти не більше як єдна особа, окрем урядника. Од понеділька урухомили тіж ґмінну касу, а од 1. червця/юнія знятый буде скороченый час роботы уряду ґміны.

Змодернізуют дорогу од Любіна

До 2022 рока выремонтуют державну дорогу номер 36 на трасі Сцинава-Любін, поінформувала о тым пресова предствничка Ґенеральной Дирекциі Державных Доріг і Автострад во Вроцлаві Маґдалена Шумята. Жытелі околиц ждут на тот ремонт уж од років. Дорога з увагы на інтенсивный рух є з рока на рік в штораз гіршым стані. Рыхтуваня до робіт ведут уж од парох років, тепер ҐДДДіА фіналізує документацию. Модернізивати будут 13-кілометровый одтинок медже желізницьовым переіздом в Сцинаві а Любіном до світел при дорозі номер 3. Роботы обнимати будут не лем зміну верхньой верствы дорогы. Трасу пошырят, побудуют здолж тротуары, змодернізуют скрижуваня. Дорога буде мала клясу ҐП – головна дорога приспішеного руху, што значыт, же шырокіст смугы руху буде выносила 3,5 метра, тротуары будут находити ся 5 метрів од дорогы, а просты одтинкы будут не коротшы як 250-400 метрів.

Зас мож доіхати до Высовы

Транспортова фірма Voyager поінформувала на своім сайті, што курсувати зас будут некотры іх автобусы. Oд 1. червця/юнія автобусы вернут покля што на дві трасы: Варшава-Закопане, через Краків, та Ґорлиці-Ропа-Высова. Є то о тілько важна інформация, што є то єдиный публичный транспорт, якій іхат через Ропицю, Лося, Климківку, Устя Рускє аж до Высовы. Інчых курсів до Высовы неє. Покля што неє інформациі, ци і коли фірма Voyager зорґанізує транспорт на інчых трасах, котры обслугувала перед выбухом пандеміі, як прим. з Ґорлиц через Білянку, Устя, Брунары, Баницю до Ізб ци получыня Ґорлиці-Новый Санч, котре тішыло ся великым заінтересуваньом.