Сумар дня на 27. марця 2025 р.

Приносиме вам сумар медияльной ґрупы ЛЕМ.фм+ на ден 27. марця 2025 р.

Антоний Крог зо званьом Почестного Амбасадора Сандецкого Штетля

Як поінформувала соспільна орґанізация Сандецкій Штетль, признала она званя Почестного Амбасадора Сандецкого Штетля Антоні Крогови, польскому етноґрафови, музейникови, якій од років велику част своіх досліджынь посвячат народній культурі, в тым лемківскій меншыні. Званя Почестного Амбасадора єст признаване особам та інститициям, якы заанґажуваны сут в меджереліґійный діалоґ, плеканя традиций і вельокультуровости на Сандеччыні. Сандецкій Штетль написал, што «сме абсолютно горды, што нашу номінацию принял Антоний Крог, выдатный писменник, етноґраф, історик культуры, пиблициста, тлумач і куратор вельох выстав». Переданя нагороды одбуде ся вчас зобраня членів Сандецкого Штетля. О даті будут іщы інформувати. Ґратулюєме!

Конвент Війтів і Бургомайстрів Ґорлицкого Повіту

В Каштели в Шымбарку одбыл ся І Конвент Війтів і Бургомайстрів Ґорлицкого Повіту. На запрошыня старосты Мирослава Вальонґа на конвент пришли м.ін. Лукаш Смулка, маршалок малопольского воєвідства і самоурядовці ґорлицкого повіту. Стріча была нагодом, жебы омовити актуальны справы, потребы і выкликы, з якыма наштоден міряют ся локальны самоуряды. Особливу увагу бесідникы посвятили справі поправы получыня Ґорлиц з автострадом А4 і модернізациі істнуючой дороговой інфраструктуры. Тепер доізд до автострады в страну Кракова заберат вельо часу. В плянах єст побудувати лучник ВД977, котрый скоротит переізд і поправит комфорт подорожы. Єдном з основных тем была плянувана до будовы обводниця Ґорлиц. Омовлено тіж розвиток роверовой інфраструктуры, в тым трасу VeloRopa. Дискусия обняла тіж розвиток желізниці і конечніст модернізациі штрек номер 110 і 103.

Збірник «Studium Carpatho-Ruthenorum 2024»

Выдавництво Пряшівского Університету выдало науковый збірник «Studium Carpatho-Ruthenorum 2024». То уж 16. річник студий з карпаторусиністікы. Головнoм едиторком і редакторком публикациі є Кветослава Копорова, робітничка Інституту Русиньского Языка і Культуры ПУ. Тогорічный збірник є дакус вынятковый. Інститут влони зорґанізувал лем єден семінар карпаторусиністикы, і так векшыну статій творят авторы, котры не выступали з даным мартериялом в рамках семінарів. Єдином выступуючом на семінарі карпаторусиністикы в минулым році была докторантка інституту Домініка Новотна, котра обробила тему пн. «Ку ґенезі еміґрантьской літературы карпатьскых Русиьнів в США. Од братств і обществ к літературным творам». В збірнику нашло ся в сумі сім дописів.

Мож ся голосити до Нагороды ім. Марияна Корнецкого

До 25. квітня/апріля завідувателі памятковых деревяных церкви, костелів, хыж, загорід, якы были зревітализуваны або пристосуваны до новых функций, можут складати зголошыня до Нагороды ім. Марияна Корнецкого. Признавана єст она за выдатны заслугы в обшыри охороны і опікы над памятками деревяной архітектуры Мапольщы. Оцініня мож так само отримати за реализацию культурно-едукацийных проєктів промуючых деревяну спадковину Малопольщы та діґітализацию памятковых деревяных обєктів. Нагорода в высокости 25 тис. зл признавана єст по рекомендациі капітулы та за постановом Заряду Малопольского Воєвідства. Деталі з тым повязаны чытайте шырше на сайті malopolska.pl.