Сумар дня на 27. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 27. лютого/фебруара 2024 р.

Безплатне маммоґрафічне баданя для жытельок ґміны Польковиці

Жытелькы ґміны Польковиці будут мати нагоду скорыстати з безплатного маммоґрафічного баданя, рефундуваного Державным Фондом Здоровля. О полну рефундацию можут ся старати жытелькы ґміны в віку од 45 до 74 років, котры протягом остатнього рока не брали участи в такым баданю. Маммобус затримат ся на польковицкым рынку 21. марця, а при участи в баданях обовязує скорша реґістрация, телефонічні або через інтернетовый сайт. Як підкрисляют орґанізаторы акциі, профіляктика то основа. Баданя мож провести без скоршого рыхтуваня і тырват оно лем пару минут, зато вартат ся записати. Більше дрібниц што до маммобуса находит ся на сайті міста Польковиці і сайті Непубличного Специялистичного Закладу Опікы Здоровля «Діаґностик».

В Яслисках прошли першы выкопалиска, што нашли науковці?

В остатнім часі в Яслисках археолоґы провели досліджыня, котры ваказали, што муры докола міста могли быти побудуваны уж під конец XV віку, і сут старшы як думали на початку. Як передал кєрівник першых в Яслисках выкопалиск, Михал Філіпович з Варшавского Університету, муры тоты то найвыже положены містецкы муры в цілій Польщы. До той поры на основі писаных джерел принмали, што охоронна конструкция возникла в другій половыні XVI віку. До тепер заховала ся структура долгости коло 15 і высокости 1,5 метра. Цілю баданя было довести, што по полудньовій стороні міста тіж находила ся конструкция, але з ріжных причын не заховала ся до днеска. Кєрівник выкопалиск додал тіж, што в часі досліджыня науковці трафили на барз цікавый предмет, якым є камінный клинец, котрый служыл до зміцніня і стабілизациі конструкциі муру. Єст то барз рідкій забыток. Власти ґміны Яслиска на основі проведеных досліджынь хотят по части одбудувати муры міста, што в будности може быти наступном туристичном атракцийом Низкого Бескіду.

Члены орґанізациі Руска Матка стрітили ся на шторічным зобраню

Як поінформувала аґентура Рутенпрес в суботу 24. лютого/фебруара в Рускым Керестурі прошла шторічна стріча орґанізациі Руска Матка, котра єст членьском орґанізацийом Світового Конґресу Русинів за Сербію. Стрічу вюл ведучый орґанізациі Михайло Фейса. Члены бесідували про діяня проведены в минулым році, як і пляны на 2024 рік. Запрезентувано нове выданя часопису «Глашнік», дисутувано на тему выдавництва та покликано новы особы на посаду секретаря і ведучого рады про освіту. Серед присутных нашли ся тіж ведучы містных орґанізаций м.ін. з Нового Саду, Вербасу ци Концура. Руска Матка в минулым році сфінансувала многє чысло активности, в тым 17. Світовый Конґрес Русинів. В рамках плянів на найблизшы місяці, окрем постійных шторічных подій, орґанізация хоче м.ін. одновити фільмовый фестіваль в Шыді ци рушыти з вырішуваньом актуальных потреб і проблемів Русинів в Сербіі.

Роверова стежка од Попраду до Старого Смоковця

Власти міста Высокы Татры плянуют будову роверовой стежкы од Попраду до Старого Смоковця. Як передали – інвестиция буде вела вздолж трасы електричной колейкы, а нова стежка ма быты на тілько шырока, жебы в наглых припадках могли з ней корыстати тіж і ратунковы службы. Хоцкі траса може ся здавати крута, сама стежка буде поведена лагідном трасом, так што аж і менше вправлены любителі роверовых прогульок будут мочы хоснувати атракцию. В будучности думкодавці хотіли бы попровадити роверову стежку вколо цілых Татр.

фот. Michał Filipowicz