Сумар дня на 27. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 27. лютого/фебруара 2023 р.

20 років спілпрацы Малопольского Воєвідства і Пряшівского Краю

В Старій Любовни 24. лютого/фебруара стрітили ся власти Самоуряду Малопольского Воєвідства і Пряшівского Самосправного Краю в звязку з припадаючом в тым році 20. річницьом спілпрацы тых реґіонів. Было підписане і символичне догваріня о дальшій спілпрацы на наступны декады. На просторі років реґіоны зреализували спільно вельо проєктів з обшыри культуры, едукациі ци інфраструктуры. В часі стрічы рішено, што іщы барже заанґажуют ся в інвестициі в рамках трансграничной спілпрацы Інтерреґ. Як подал маршалок малопольского воєвідства Вітольд Козловскій, будут покликаны специяльны ґрупы, якы займут ся конкретныма обшырями спілпрацы.

Авторска стріча з др. Губертом Оссадником

Заряд Кружка Туристичных Провідників при одділіню ПТТК в Коросні, Клюб К15 та Выдавництво Лібра просят на авторску стрічу з др. Губертом Оссадником, автором книжкы пн. ««Медже Ославом а Ясьолком. Східня Лемковина в роках 1918-1938». Історично-етноґрафічне студиюм м.ін. представлят Лемків з іх політичном, соспільном і економічном активністю, конфесийны односины, обряды, традициі, описує выбраны елементы материяльной культуры, головно на основі материяльів Музею Народного Будівництва в Саноку ци мало знаных квестийонарів саноцкого Шкільного Інспекторату з половины 30. років ХХ столітя. Стріча одбуде ся 6. марця о 17.00 год. в Клюбі К15 в Коросні. Вступне на подію дармо.

Нова выставя в Музею Никыфора

В минулу пятницю в Музею Никыфора в Креници прошол вернісаж выставы прац лемкіского маларя примітивісты Епіфана Дровняка, якы походят з колекциі Центра Культуры в Креници. В Музею Никыфора сут презентуваны першыраз. Колекция рахує 61 прац, з чого запрезентуваных буде 45 образів. Як подає куратор музею Збіґнєв Волянін, креницка колекция є єдном з найціннійшых, сут в ній м.ін. бескідскы ляндшафты, образы церкви, желізницьовых стаций, святых і архітектура. Цінным елементом колекциі сут малы образкы, на котрых сут сельскы і містецкы кухні. Окрем Крениці на образах сут тіж Поворозник і Мушына, де артиста одвиджал знаємых лемківскых ґаздів. За Воляніном, днес колекция може ся добрі придати в промоциі Крениці, так як Никыфор стал правдивым «амбасадором» курорту серед люди штукы на цілым світі. Выставу в Музею Никыфора можете обзерати до 21. мая тр.

Неодолга конец выставы «Хыжкы / Низкій Безкід»

Іщы лем до 8. марця в Музею Дворы Карвациянів і Ґладышів мож обзерати выставу авторства Юлиі Яржы пн. «Хыжкы / Низкій Безкід». Працы над презентуваным на выставі цикльом образів тырвали два рокы. Творы сут пробом затриманя в артистичным кадрі найкрасшых, а часто лишеных мешкальных домів, костелів, церкви, як і будинків епохы PRL, якы творят незвычайный кольорит реґіону. Більшіст прац была зрыхтуваня в мішаній техніці – еколіна і лінорыт, лученій техніком коляжу.