Сумар дня на 27. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 27. листопада/новембра 2020 р.

До Кракова з Ґорлиц лем дві годины потягом?

Mіста Малопольщы хотят доступу до желізниці, а шансы на тото, же стараня закінчат ся успіхом, значучо ся збільшыли. Пят внесків зложеных в реґіоні до урядового проґраму «Желізниця+» перешло до другого етапу кваліфікациі. На ціліст уряд влады презначыл веце як 6,5 млд зл. Выбраны до реализациі інвестициі мают быти закінчены до 2028 рока. Проґрам «Желізниця+» закладат так само модернізацию істнуючых леній, як і побудуваня новых штрек. Цілю є поправити получыня міст выже 10 тис. жытелів з воєвідскыма містами. Серед внесків нашол ся і тот о реализацию леній 108 і 110, якы лучат Ґорлиці з Яслом. Ґорлицкій проєкт закладат будову новой лучниці і перебудову інфраструктуры, завдякы чому подорож до Кракова могла бы тырвати невельо веце як 2 годины. Авторы внесків мусят заґарантувати, што через 5 років по будові одтинка ци модернізациі леніі будут на них курсувати найменше 4 пары потягів. Ривалізация є велика, бо до другого етапу закваліфікували аж 79 проєктів з цілой Польщы.

Одвертальны Джерела Енерґіі на обшыри Мідьового Басену

В минулым тыжни парунадцет єдиниц підписало інтенцийный лист в справі взаімной спілпрацы для розвитку Одвертальных Джерел Енерґіі на обшыри Мідьового Басену. На онляйновій конференциі, зорґанізуваній через Союз Роботодавців Польска Мід вєдно з компанійом KGHM, вчас котрой задеклярувано охоту спілпрацы, присутны были представникы пятнадцетьох самурядів, м.ін. ґміны Ґлоґів, Радваниці, Пшемків, Любін, Рудна ци міста Ґлоґів, Польковиці, Ліґниця і іхніх повітів. Як спостерюг заступця презеса Союзу Роботодавців Польска Мід Михал Кєлян, реченый лист є великым кроком до того, жебы реґіон стал ся лідером Одвертальных Джерел Енерґіі в скали державы. Спілпраца операла буде ся м.ін. на ініциюваню і ведіню консультаций цілю выпрацуваня адміністрацийно-орґанізацийых розвязань в обшыри Одвертальных Джерел Енерґіі, на окрисліню місц під інсталяцию реченых джерел ци інтеґруваню середовиск заінтересуваных розвитком низкоемісийной господаркы.

Выліцитуй Никыфора

«Вид на рынок», «Містный ляндшафт» ци «Автопортрет» то лем выбраны акварелі авторства Никыфора Креницкого, котры буде можна выліцитувати на авкциі 1. грдуня/децембра в DESA Unicum. Вшыткых довоєнных Никыфоровых робіт буде до выліцитуваня сім штук. Окрем робіт Дровняка на авкциі пн. «Роботы на папері. Бывша штука» буде мож купити рисункы Станіслава Віткєвича ци Станіслава Выспяньского. Вшыткы обєкты до выліцитуваня мож обзерати на передавкцийній презентациі та на выставі 3Д [3D]. Естимацийны ціны за роботы лемківского примітивісты находят ся в границях од 7 до 28 тис. зл. Ліцитувати буде можна онляйн, через аплікацию та телефонічні і через постійну диспозицию.

Уж певністю діти в Ясюнці будут мати вымрияну карузелю

В половині літа інформували сме, што дітям в Ясюнці і Кривій замрияла ся карузеля – така, яку мож найти праві на каждым пляци забав в векшым або меншым місті. Наймолодшы жытелі Ясюнкы взяли справы в своі рукы і отворили склепик, в котрым продавали рисункы і дрібну кераміку, жебы заробити грошы на закуп карузелі. Ґміна Санкова поінформувала вчера, што достала лист од діти, котры похвалили ся результатом акциі – повело ся ім зобрати 7 тис. зл. Другє тільо задеклярувала доложыти дітям війт ґміны Малґожата Малух, жебы підперти реализацию закупу вымрияной карузелі. Як подали діти – місце під карузелю уж мают выбране.