Сумар дня на 27. липця/юлия 2020 р.

Приносиме вам сумар медияльной ґрупы ЛЕМ.фм+ на ден 27. липця/юлия 2020 р.

Розспівані в Выгорлятскым Музею в Гуменным

Выгорлятскій Музей в Гуменным вєдно з партнерами просит на концерт народных співанок реґіональных фольклористів під наголовком «Пісні Мариі Чокиновой з Ублі». Концерт є присвяченый єдній з найвызначнійшых інтерпретаторок традицийных русиньскых співанок на выжнім Земплині – Мариі Чокиновій, з нагоды десятой річниці єй смерти. Подія пройде 2. серпня/авґуста о 16.00 год в скансені. В концертовым проґрамі выступлят солисты Людовіт Джубак, Ванда Марінчакова, Людка Квашна, дівоча співоча ґрупа Босорочкы, мужска співоча ґрупа Гачуре, фольклорный колектив Хемлон Гуменне і дітячый фольклорный колектив Хемлонячік з Гуменного. Концерт в скансені в рамках літньой оферты Выгорлятского Музею єст частю дослідничо-документальной і освітовой діяльности музею, котра підтримує презентацию нематерияльной культуровой спадковины реґіону. Подію підпорила і Русиньска Оброда на Словациі.

Підкарпатска Фільмова Пут в Яслисках

В Яслисках одкрыют Підкарпатску Фільмову Пут. Єст то перша того рода ініциятива в реґіоні. Фільмова істория Яслиск єст выняткова, понеже місце тото протягом років зберало вельох фільмовців. В Яслисках награли пару продукций, якы отримали преміі і за границями Польщы, м.ін. нагородженый Срібным Медведьом на Фестівали в Берліні фільм «Лице» (в реж. Малґожаты Шумовской), ци влонишній кандидат до Оскара «Боже Тіло» (в реж. Яна Комасы). Проґрам подіі розложеный єст на два вікендовы дни, 15. і 16. серпня/авґуста. В проґрамі проєкциі філмьмів, стрічы з іх творцями і акторами, концерт, а тіж прогулькы з провідником, на основі мап Підкарпатской Фільмовой Пути. В часі подіі будут доступны стрефа реляксу і ґастрономічны пункты, як і пункты продажы реґіональных продуктів. З причыны пандеміі коронавіруса на подіі буде обовязувал специяльный санітарный режім. Чысло місц ограничене, а участникы будут мусіти носити маскы. З той самой причыны будут тіж збераны особовы даны участників. Вступне на подію дармо.

Стрічы з Іконом в Любіні

Православна парохія Святой Тройці в Любіні просит до участи в наступній едициі стріч з Іконом через участ в іконоґрафічных варштатах веденых іконоґрафом Яном Ґріґоруком в днях од 5. до 10. жолтня/октобра 2020 рока. Зголосити ся на варштаты мож майльовом дорогом, посылаючы відоміст на адрес: cerkiew_lubin@op.pl. Чысло місц ограничене. Варштаты сут направлены на дорослых і ліцейну молодіж. Кошт участи в варштатах то 500 зл, в тым сут авторскы выклады і прелекциі, тыжньовы варштаты писаня ікон, дошкы, фарбы і інче потрібне ґратя. Подія пройде в сали парафіяльного дому при ул. 1 Мая 13Б в Любіні. Одкрытя варштатів 5. жолтня/октобра тр. о 16.00 год.

Ярмак Ікон в Саноку

Артистичны варшаты одбудут ся тіж неодолга на саноцкым рынку в рамках проходячого гын 8.-9. серпня/авґуста Ярмаку Ікон. На подіі запрезентуют ся народны артисты і ремісникы з цілой Польщы. Окрем артистичных варштатів будут тіж нп. музичны выступы і атракциі для діти. В суботу, 8. серпня/авґуста, буде мож окрем інчого взяти участ в кулінарных варштатах, проєкциях фільмів о Бєщадах або концерті церковной музикы в Церкви св. Тройці в Саноку. 9. серпня/авґуста буде мож послухати оркєстры «Аванті», як тіж взяти участ в керамічных і плястичных варштатах. Деталі найдете на офіцияльным сайті міста Санок.