Сумар дня на 27. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 27. квітня/апріля 2021 р.

Пісня «Страдальна Мати» в выконаню ансамблю Терочка

Для вірных православной Церкви на цілым світі та вірных грекокатолицкой Церкви в дакотрых реґіонах то уж остатній тыжден Великого Посту, в часі котрого рыхтуют ся до Господньой Пасхы. З той нагоды молодіжный ансамбль Руской Бурсы в Ґорлицях Терочка, під артистичным кєрівництвом Андрия Трохановского, награл великопістну пісню «Страдальна Мати». Премєра пісні прошла вчера, 26. квітня/апріля, в ден початку Великого Тыжня. Награня можна обзерати онлянй, на офіцийным фейсбуковым сайті ансамблю Терочка.

Думка на прогульку по санківскых шляках

На офіцийным сайті Ґміны Санкова вказала ся пропозиция пішых прогульок по ґмінных шляках, не лем для туристів, але особливо для жытелів ґміны. Єдном з них єст стежка здоровля на Маґурі. Прогульку можна зачати на паркінґу на Маластівскым перевалі при воєнным цмонтери но 60 або спід нижньой лыжной стациі і іти пак в страну выжньой. Ниже стежкы здоровля находит ся родинный рекреацийный парк, выпосаженый в ґратя, на якым мож тренувати ся, ци місце до забав для діти. В парку находит ся видокова плятформа, з котрой можна обзерати краєвид Низкого Бескіду. Єст тіж шатрова колиба для любителів ночуваня близко природы.

В Корчыні близко Біча будуют нештоденну атракцию

Бесіда о музею особистой зброі уланів. Ініциятором його основаня єст Вєслав Червєнь, презес Історичного Стоваришыня Польской Ізды та член 8. Полку Уланів князя Юзефа Понятовского. Він тіж занимат ся будовом нового музею. Нову атракцию дадут артефакты зо збіркы ініциятора, м.ін. таборовый віз, польова кухня, кужня, мундуры, а аж і зроблены Червєньом реплікы карабінів ци конных поіздів кавалериі. Думкодавця музею мриє, же даколи будут гев ведены і лекциі істориі – легше єст передати знаня, як можна вказати експонаты. Обєкт, в котрым найде ся музей, будуваный єст зо старых елементів хыж ци ґаздівок, котры были презначены до розбуріня. Нова атракция найде ся недалеко недавно отвореной Старопольской Кужні, думкодавцьом і творцьом котрой тіж єст Вєслав Червєнь. Одкрытя нового музею заплянуване єст на третій вікенд червця/юнія.

Акция прятаня шляків в Низкым і Сандецкым Бескідах

В остатнім часі охочы беручы участ в акциі «Дбаме о Сандецкє» попрятали близко 14 км пути в Низкым Бескіді. Разом зобрали аж 19 80-літровых мішків смітя. Была то перша з пятьох заплянуваных Фундацийом Новы Напрямы акция прятаня. Волонтеры і жытелі реґіону ішли синім шляком з Перевалу над Колибом в Боґушы на Яворі. Орґанізаторы подіі апелюют, жебы дбати о спільне добро і заберати вшытко, што ся зо собом приносит на пути, назад дохыж. Надіют ся, же акция принесе результаты, а до наступной едициі, котра пройде в маю, зголосит ся іщы більше охочых попрятати пути Низкого і Сандецкого Бескідів.